Россиянинг жанубий ҳудудларида 16 — 17 июнь кунлари ёғган тропик ёмғир туфайли уйларни сув босди. Кучли ёмғир, шунингдек, электр энергияси ва транспорт ҳаракатининг узилишига олиб келди, деб ёзади «РБК».
Керчда туни билан давом этган ёмғирдан бутун шаҳар айниқса марказий қисм зарар кўрди. 230 дан ортиқ хусусий ва кўп қаватли уйларни сув босди. Сув тошқини туфайли Керч яқинидаги одамлар эвакуация қилинмоқда.
Керчда 17 июнь куни бир кечада ёғган ёмғир 1,5 ойлик ёғингарчилик миқдорига тенг. Шаҳар аҳолисидан шахсий автоуловларда йўлга чиқмаслик сўралмоқда, шунингдек уларга ерости йўлларида ва бошқа чуқурликда жойлашган хоналарда бўлмаслик тавсия этилади.
Керчдаги Мелек-Чесме ва Жаржава дарёлари қирғоғидан тошиб кетди. Кучли шамол дарахтларни қулатиб, электр узатиш тармоқларини шикастлади. Шаҳарнинг марказий қисмида, шу жумладан касалхонада электр энергияси йўқ. Унинг ишлашини таъминлаш учун генератор ўрнатилди.
Қримнинг Фавқулодда вазиятлар вазирлиги огоҳлантиришича, 18 июнь куни ҳам кучли ёмғир, момақалдироқ ва шиддатли шамол кутилмоқда.
Кучли ёмғир Ростов вилоятини ҳам қамраб олди. Ростов-Донда уйлар сув остида қолмоқда, сув тошқинлари туфайли шаҳарда кўплаб йўл-транспорт ҳодисалари содир бўлган. Ростов вилоятида кейинги кунларда ҳам об-ҳаво ёмон бўлиши башорат қилинмоқда.
Фавқулодда ва бўронли об-ҳаво Краснодар ўлкасига ҳам ўз таъсирини ўтказмоқда. Синоптикларнинг маълумотларига кўра, минтақада ёғингарчиликнинг катта қисми Анапа ва Таман шаҳарларига тушган.
Изоҳ (0)