Коронавирус авж олиши туфайли Хитой портларида юзага келган тирбандликлар жаҳон савдосини тўхтатиб қўйиши мумкин

Хитойнинг Гуандун провинциясида коронавирус инфекциясининг қайта авж олиши мамлакат жанубидаги йирик портлар ишида узилишларни келтириб чиқарди, бу эса глобал контейнер ташувлари соҳасида жиддий узилишларга олиб келиши мумкин, деб ёзади «Интерфакс».

COVID-19’нинг қайта авж олиши билан боғлиқ ҳолда Хитойнинг Шэньчжэнь портидаги Яньтянь контейнер терминалининг қисман ёпилиши товарларни яқин атрофдаги Наньша ва Шэкоу терминаллари фойдасига қайта тақсимлашга олиб келди, бу эса ушбу терминалларда узилишлар ва тирбандликка сабаб бўлди, деб ёзади нашр.

«COVID-19 эпидемиясининг олдини олиш чораси сифатида Яньтянь порти 25 майдан 31 майгача ёпиқ эди. Натижада порт ичида ва ташқарисида юкларнинг катта тирбандлиги ҳосил бўлди», — дейди Россия ва МДҲ давлатларидаги Kuehne + Nagel компаниясининг денгиз транспорти бўйича вице-президенти Марио Врлжичак. У Яньтяннинг бир қисми очилгани, аммо порт аввалги қувватининг атиги 30 фоизини ишлатаётганини таъкидлади.

Бунинг натижасида баъзи кемалар муқобил портларга — Наньша, Шэкоу ва Гонконгга йўналтирилган, аммо улар барча тўпланган юк контейнерларини сиғдира олмайди. Бундан ташқари, божхона талаблари юкларни бир портдан иккинчисига ўтказиш имкониятини чеклайди, деди вице-президент.

Таъкидланишича, Шэкоу ва Наньша портларида юзага келаётган қийинчиликлар сабаб контейнерлар 15—16 кунлаб ушланиб қолмоқда. Бу эса ташиш нархига таъсир кўрсатади.

Мутахассислар фикрича, Жанубий Хитой портлари фаолиятидаги узилишлар денгиз савдо-сотиғига кўрсатадиган таъсир Ever Given кемасининг Сувайш каналини бир ҳафта тўсиб қўйиб етказган зараридан кўпроқ бўлиши мумкин.

Vespucci Maritime бош директори Ларс Йенсеннинг сўзларига кўра, Яньтянь портидаги ушланиб қолаётган юкларнинг ўртача кунлик ҳажми 25,5 минг TEU’ни ташкил этади. «Сувайшнинг блокланиши кунига 55 минг TEU’га таъсир қилган. Аммо бу атиги олти кун давом этган. Яньтянь масаласида 14 кун ҳақида гап кетяпти, вазият ривожи Наньша ва Шэкоуга қадар давом этмоқда», — деди эксперт.

Таъкидланишича, вужудга келган тирбандлик портлар нормал иш фаолиятини бошлаши билан яна икки-беш ҳафта давомида босқичма-босқич бартараф этилади.

Бозор иштирокчилари мавжуд вазият юк ташиш ставкаларининг янада ўсишига олиб келади деган фикрда. Ставкалар июнь ойида кўтарилишни бошлайди ва эҳтимол, «ушбу кечикишлар таъсирида июль ойида янада ўсиши мумкин».