Ever Given konteyner tashuvchi kemasi ko‘ndalang tiqilib qolib, Suvaysh kanalining to‘sib qo‘yilishi oqibatida kanal ma’muriyatiga yetkazilgan zarar taxminan 1 milliard dollarni tashkil etdi. Bu haqda ma’muriyat rahbari Usama Rabiga tayanib, “Kommersant” xabar berdi.

Foto: AP Photo

Ma’muriyat rahbarining so‘zlariga ko‘ra, hodisa yuzasidan tekshiruvlar kamida bir hafta davom etadi. Tekshiruv tugamagunga qadar Ever Given kanalni tark etmaydi.

“Zararni hisoblashda hali davom etamiz. Hodisaning birinchi kunidan boshlab sarflangan barcha mablag‘ni, tun-u kun ishlagan shatakchi va suv osti kemalari uchun sarflangan xarajatlarni hisobga olamiz, bu juda katta summani tashkil etadi”, — dedi Rabi Sada al-Balad telekanaliga bergan bayonotida.

Uning ta’kidlashicha, zararning dastlabki miqdori “1 milliard dollar yoki shunga yaqin”. “Bu haqli ravishda davlatga tegishli mablag‘”, — deb qo‘shimcha qildi kanal ma’muriyati rahbari.

Allianz nashri Suvaysh kanalining to‘silib qolishidan jahon savdosiga yetkazilgan zararni haftasiga 6—10 milliard dollar, deb baholagan. The Loadstar ma’lumotlariga ko‘ra, navbatda turib qolgan kemalarning ekspluatatsiya xarajatlari konteyner tashuvchilar uchun kuniga taxminan 3,25 million dollar va tankerlar uchun taxminan 500 ming dollarni tashkil etgan.

Avvalroq kemalar qatnovi bo‘yicha Lloyd’s List kompaniyasi hisob-kitoblariga ko‘ra, Suvaysh kanalida sayozlikka tiqilib qolgan Ever Given konteyner tashuvchi kemasi tomonidan kemalar yo‘lining to‘sib qo‘yilishi jahon savdosiga soatiga 400 million dollarga tushayotgan edi. Misrning Ever Given bilan bog‘liq vaziyatdan ko‘rayotgan talafoti kuniga 14 million dollarga baholangan.

Eslatib o‘tamiz, 23-mart kuni Ever Given kemasi kuchli shamol va qum bo‘roni tufayli yo‘nalishini o‘zgartirib, burun va quyruq qismlari bilan ikkala qirg‘oqqa tiralib qolib, Suvaysh kanalining bir magistralli janubiy qismini to‘sib qo‘ygan edi. Buning natijasida 450 dan ortiq kemadan iborat tirbandlik yuzaga kelgan edi. Shuningdek, hodisa ortidan neft narxi keskin o‘sgan.

Suvaysh kanali orqali ikki yo‘nalishda ham kemalar harakati 29-mart, dushanba oqshomidan qayta tiklandi. Suvaysh kanali ma’muriyatining yana bir rahbari, Misr prezidenti maslahatchisi Moxab Mamish kanalning to‘silib qolishida Ever Given kemasi kapitanini aybdor qildi.