Жанубий Кореянинг Икки Корея давлатини бирлаштириш вазирлиги 15 июнь куни КХДРни Кореялараро алоқа линияларини зудлик билан тиклашга чақирди, деб ёзади «Интерфакс».
«Кореялараро алоқа канали зудлик билан ҳеч қандай шартларсиз тикланиши керак. Биз Шимолий Кореяни икки давлат ўртасидаги алоқа линияларини тиклашга чақирамиз», — дейилади икки Кореяни бирлаштириш бўйича вазирлик вакили хабарида.
Вакилнинг сўзларига кўра, «Кореялараро алоқа канали энг асосий алоқа воситаси бўлиб, илгари икки томон бундай канални сақлаб қолиш тўғрисида бир неча бор келишиб олган».
2019 йил февраль ойида Ханойда бўлиб ўтган АҚШ—КХДР саммити келишувсиз якунлангандан сўнг Шимол музокаралар ва трансчегаравий ҳамкорлик бўйича таклифларга жавоб бермай қўйган. Ўшандан буён икки Корея ўртасидаги муносабатлар совуқлигича қолмоқда.
2020 йил 16 июнда КХДР расмийлари Сеул билан барча мавжуд алоқа каналлари орқали алоқаларни тўхтатганини эълон қилди. Кейинчалик демилитаризация зонаси яқинидаги Кэсон технопаркидаги Кореялараро алоқалар идораси портлатилгани маълум бўлди. КХДР расмийлари ўзларининг қарори билан бино вайрон қилинганини тасдиқлаган.
Аввалроқ Ким Чен Ин Жанубий Корея мусиқа ва фильмларига қарши уруш эълон қилгани ҳақида хабар берилганди. Унга кўра, мамлакатда Жанубий Корея фильмларини томоша қилган ва мусиқаларини тинглаганлар учун жазо кучайтириладиган бўлди.
Изоҳ (0)