Жонс Ҳопкинс университети маълумотларига кўра, дунё бўйича коронавирусни юқтириб олганлар сони 176 274 200 кишини ташкил қилмоқда. COVID-19 қурбонлари сони эса 3 812 377 кишига етди. Касалланиш ҳолатларининг кўплиги бўйича жаҳонда АҚШ (33,4 миллион), Ҳиндистон (29,5 миллион), Бразилия (17,4 миллион), Франция (5,8 миллион) ва Туркия (5,3 миллион) етакчилик қилмоқда.
Қирғизистонда коронавируснинг учинчи тўлқини юз бермоқда
Қирғизистон соғлиқни сақлаш вазири ўринбосари Жалолиддин Раҳматуллаев мамлакатда коронавирус инфекциясининг учинчи тўлқини юз бераётганини маълум қилди.«Пандемия бошидан буён коронавирус инфекциясининг эпидемиологик кўтарилиши икки марта кузатилди: 2020 йил июлида ва ноябрида. Бугунги кунда касалликнинг учинчи тўлқини кузатилмоқда, у 2021 йил апрелда бошланган», — деди у.
Мансабдорнинг сўзларига кўра, Республика Соғлиқни сақлаш вазирлиги COVID-19 яна авж олишига тайёр турибди: «қизил» зоналарда ишлаш учун кадрлар захираси яратилган, шунингдек, COVID-беморлар учун қўшимча ўринлар яратилган.
Эрон ўзининг коронавирусга қарши вакцинасини маъқуллади
Эрон ҳукумати мамлакатда ишлаб чиқарилган коронавирус инфекциясига қарши биринчи вакцина — COVIran Barekat вакцинасидан фавқулодда фойдаланишга рухсат берди.Эроннинг Shifafarmed фармацевтика компанияси томонидан ишлаб чиқилган ушбу вакцинанинг асосини фаолсизлантирилган (ўлдирилган) вирус ташкил қилади. Вакцинанинг хавфсизлиги ва самарадорлиги бўйича илк тадқиқотлар 2020 йилнинг декабрида бошланган эди.
Таъкидланишича, COVID-вакциналар импорти билан боғлиқ муаммолар туфайли мамлакат ўз вакцинасини ишлаб чиқишга қарор қилган. Эронда оммавий вакцинация бошлашга Америка санкциялари халал берган.
АП ёзишича, Эрон Яқин Шарқда пандемиядан энг кўп зарар кўрган давлат ҳисобланади.
Покистонда эмланишдан бош тортганлар мобил алоқадан узиб қўйилиши мумкин
Покистондаги вилоятлар ҳукуматлари коронавирусга қарши эмланишдан бош тортганлик учун жазо сифатида мобил алоқадан узиб қўйиш чорасини қўллашини эълон қилди.Дастлаб ушбу чора таклиф сифатида илгари сурилган. Аммо одамлар вакцина олишга журъат қилавермаганидан кейин амалда қўллашга қарор қилинган.
Эмланишдан бош тортган давлат ишчиларига июлдан маош тўланмай қўйилади. Мобил алоқадан узиб қўйиш билан Покистон Давлат алоқа агентлиги шуғулланади.
Покистон Ёш шифокорлар уюшмаси раҳбари Салмон Ҳасибнинг аниқлик киритишича, одамлар вакциналар ҳақида миш-мишлар ва ёлғон хабарлар тарқатмоқда. Улар орасида энг кўп тарқалгани вакцинациянинг икки йил ичида бепуштлик ёки ўлимга олиб келиши ҳақидаги миш-мишдир.
Айни вақтда эмланган покистонликларга кинотеатр, базмхоналар ва зиёратгоҳларга ташриф буюриш учун рухсат берилади. Ходимларининг 20 фоиздан ортиғи эмланган корхоналар учун эса уларнинг фаолияти билан боғлиқ чекловлар бекор қилинади.
Мавзуга доир: Покистон «Спутник V» вакцинасини рўйхатдан ўтказди
- «Роспотребнадзор» COVID-19’га қарши эмланишдан олдин ёки кейин аллергияга қарши дорилар ичиш тавсия этилмаслигини, улар иммун жавобига салбий таъсир кўрсатиши мумкинлигини маълум қилди. Вакцина олишга организмни тайёрлаш мақсадида антигистамин воситалар қабул қилиш керак эмас, чунки улар вакцина бериши мумкин бўлган реакцияни камайтиришга, тана ҳарорати ошиши ва укол жойида оғриқлар пайдо бўлишига олиб келиши мумкин.
- Исроил Соғлиқни сақлаш вазирлиги бино ичида ниқоб тақиш мажбуриятини бекор қилди. Бу 15 июндан кучга кирди. Фақатгина авиарейслар йўловчилари ниқоб тақиши керак бўлади, шунингдек, баъзи тиббий муассасаларда ҳам бу қоида кучда қолади.
- Коронавируснинг Delta деб ном берилган штамми («ҳиндча» штамм) аллақачон 74 та давлатга тарқалишга улгурган. У тезкорлик билан тарқалишда давом этмоқда ва бутун дунёда етакчи штаммга айланиши хавфи бор.
Изоҳ (0)