Женевада бўлиб ўтадиган Россия—Америка саммити арафасида Россия президенти Владимир Путин Кремлда NBC News журналисти Кир Симмонсга интервью берди. Америка телеканали суҳбатнинг инглиз тилидаги версиясини 14 июнь куни эълон қилди. Кейинчалик Кремль веб-сайтида рус тилидаги стенограмма пайдо бўлди. Meduza Россия президентининг интервьюсидаги асосий мавзуларни чоп этди.

Алексей Навальний ҳақида

Путин сиёсий рақибини йўқ қилишга буйруқ берганини рад этди. «Бизда кимнидир ўлдириш одати йўқ», — деди президент. Шу билан бирга, у ҳозир ҳибсда бўлган Навальнийнинг қамоқдан соғ-саломат озод қилинишига ҳам кафолат бермади.

«Қулоқ солинг, бизнинг мамлакатда озод қилиш ёки озод қилмаслик тўғрисидаги қарорларни президент эмас, суд қабул қилади. Қамоқда Навальнийга ҳеч ким бошқаларга нисбатан ёмонроқ муносабатда бўлмайди», — дея қўшимча қилди Путин.

«Унинг исми Алексей Навальний», — шарҳлади NBC журналисти. «Сиз уни қамоқдан чиқади деб айтишга тайёр эмасмисиз?»

«Бу муҳим эмас. Уни қандай маъқул кўрсангиз, шундай аташингиз мумкин, у қамоқдаги одамлардан бири, холос», — деб жавоб қилди Путин.

АҚШ сайловларига аралашиш ҳақида

Путин Россия хакерларига ва Россия ҳукуматига Америка сайловларига аралашиш бўйича қўйилган айбловларни «туганмас масхарабозлик» деб атади.

«Бизни дунёдаги ҳамма нарсада айблашган. Сайловларга аралашиш, киберҳужумлар ва ҳоказолар. Аммо ҳеч ким ҳеч қачон бирор далил-исбот келтириш ташвишини қилмаган. Фақатгина асоссиз айбловлар», — деди Россия Федерацияси президенти. «Black Lives Matter ҳаракатини қўзғатишда ҳалигача айбланмай келаётганимизга ҳайронман. Бундай асоссиз айбловлар бўйича сизга биргина жавоб бера оламан: Халқаро жинсий ислоҳотлар лигасига шикоят қилишингиз мумкин. Шунга розимисиз?» — дея қўшимча қилди Путин.

АҚШ билан ҳамкорлик ҳақида

Путин кибержиноятчиликка қарши курашда Москва ва Вашингтон кучларни бирлаштириши мумкинлигига умид қилмоқда. «Бу жараённи АҚШдаги шерикларимиз билан бошлашимизга катта умидимиз бор», — дейди у.

Бундан ташқари, Путин Байден билан маҳбусларни айирбошлаш масаласини муҳокама қилишга тайёрлигини айтди. «Биламан, бизнинг қамоқхоналарда АҚШ фуқаролари бор, аммо АҚШ қамоқхонасида қанчадан қанча Россия фуқаролари борлигини кўрсангиз эди, улар саноқсиз», — деди у. Шунингдек, унинг сўзларига кўра, Россия агар америкалик ҳамкорлари бош тортмаса, космик соҳада АҚШ билан ҳамкорликни давом эттиради. Россия раҳбарининг фикрича, Москва ва Вашингтон ўртасидаги муносабатларда сўнгги йилларда олдиндан кўра билиш ва барқарорлик етишмаяпти.

Капитолийга ҳужум ҳақида

Путиннинг таъкидлашича, Россия бошқача фикрлаганларга босим ўтказишда айбланмоқда, аммо АҚШнинг ўзи ўз фуқароларини сиёсий қарашлари учун таъқиб қилмоқда. Бунга мисол сифатида у Трамп тарафдорларининг Капитолийга бостириб кириши воқеасини келтирди. «Бизда бир мақол бор: юзинг қийшиқ бўлса, ойнадан ўпкалама. Буни сизга шахсан ҳеч қандай алоқаси йўқ, лекин кимдир сизни бирор нимада айбласа, ўзингизга разм соласиз, ойнада бизни эмас, ўзингизни кўрасиз. Бу ерда ғайриоддий ҳеч нарса йўқ», — деди президент.

«Қани айтинг-чи, сиз Конгрессга кирган ва полиция ходими томонидан ўққа тутилган аёлни ўлдиришни буюрганмидингиз? Конгрессга бостириб кирганларнинг 450 нафари ҳибсга олинганини биласизми? Улар бинога компьютер ўғирлаш учун келмаган эди, улар сиёсий талаблар билан келган», — деди Путин журналистга.

Байден ҳақида

Путин 2011 йилда Байден билан учрашувда унинг Россия раҳбарида «қалб етишмайди» деган сўзларини эслай олмаслигини айтди. У Қўшма Штатларнинг амалдаги президентини бирга ишлаш мумкин бўлган профессионал сифатида тавсифлади. «У деярли бутун ҳаётини сиёсат ичида ўтказди», — деди Путин.

Трамп ҳақида

Путин Американинг собиқ раҳбарини «ажойиб, истеъдодли ва ёрқин шахс» деб атади. «Акс ҳолда, у АҚШ президенти бўла олмасди. У кимгадир ёқиши, кимгадир ёқмаслиги мумкин», — деди Путин.

Путин қотилми?

NBC News журналистининг мазкур саволига Путин шундай жавоб берди: «Ишим давомида мен жуда кўп сабабларга кўра турли даражадаги ва ҳар хил йўналишдаги ҳужумларга одатланиб қолганман. Бу мени ажаблантирмайди. Мен ўнлаб бундай айбловларни эшитганман».

Путин ҳукмронлиги йилларида Россияда ўлдирилган одамларнинг номлари келтирилган рўйхат ҳақидаги саволга у шундай жавоб берди: «Биласизми, қўпол гапиришни истамасдим, лекин бу қандайдир тарзда ошқозон оғриғига ўхшайди, фақат оғзаки шаклдаги».

Ворис ҳақида

Путин «қачондир бошқа бир одам, албатта, менинг ўрнимни эгаллайди» — дея таъкидлади. «Агар менинг фаолиятимга танқидий ёндашса ҳам, бирор инсонни ватанга содиқлигини, ватан учун нафақат йиллар, балки бутун ҳаётини фидо қилишга тайёрлигини кўрсам, у менга қандай муносабатда бўлишидан қатъи назар, бундай инсонларни қўллаб- қувватлаш учун ҳамма нарсани қиламан», — деди Россия президенти.