Xitoyning Guandun provinsiyasida koronavirus infeksiyasining qayta avj olishi mamlakat janubidagi yirik portlar ishida uzilishlarni keltirib chiqardi, bu esa global konteyner tashuvlari sohasida jiddiy uzilishlarga olib kelishi mumkin, deb yozadi “Interfaks”.
COVID-19’ning qayta avj olishi bilan bog‘liq holda Xitoyning Shenchjen portidagi Yantyan konteyner terminalining qisman yopilishi tovarlarni yaqin atrofdagi Nansha va Shekou terminallari foydasiga qayta taqsimlashga olib keldi, bu esa ushbu terminallarda uzilishlar va tirbandlikka sabab bo‘ldi, deb yozadi nashr.
“COVID-19 epidemiyasining oldini olish chorasi sifatida Yantyan porti 25-maydan 31-maygacha yopiq edi. Natijada port ichida va tashqarisida yuklarning katta tirbandligi hosil bo‘ldi”, — deydi Rossiya va MDH davlatlaridagi Kuehne + Nagel kompaniyasining dengiz transporti bo‘yicha vitse-prezidenti Mario Vrljichak. U Yantyanning bir qismi ochilgani, ammo port avvalgi quvvatining atigi 30 foizini ishlatayotganini ta’kidladi.
Buning natijasida ba’zi kemalar muqobil portlarga — Nansha, Shekou va Gonkongga yo‘naltirilgan, ammo ular barcha to‘plangan yuk konteynerlarini sig‘dira olmaydi. Bundan tashqari, bojxona talablari yuklarni bir portdan ikkinchisiga o‘tkazish imkoniyatini cheklaydi, dedi vitse-prezident.
Ta’kidlanishicha, Shekou va Nansha portlarida yuzaga kelayotgan qiyinchiliklar sabab konteynerlar 15—16 kunlab ushlanib qolmoqda. Bu esa tashish narxiga ta’sir ko‘rsatadi.
Mutaxassislar fikricha, Janubiy Xitoy portlari faoliyatidagi uzilishlar dengiz savdo-sotig‘iga ko‘rsatadigan ta’sir Ever Given kemasining Suvaysh kanalini bir hafta to‘sib qo‘yib yetkazgan zararidan ko‘proq bo‘lishi mumkin.
Vespucci Maritime bosh direktori Lars Yensenning so‘zlariga ko‘ra, Yantyan portidagi ushlanib qolayotgan yuklarning o‘rtacha kunlik hajmi 25,5 ming TEU’ni tashkil etadi. “Suvayshning bloklanishi kuniga 55 ming TEU’ga ta’sir qilgan. Ammo bu atigi olti kun davom etgan. Yantyan masalasida 14 kun haqida gap ketyapti, vaziyat rivoji Nansha va Shekouga qadar davom etmoqda”, — dedi ekspert.
Ta’kidlanishicha, vujudga kelgan tirbandlik portlar normal ish faoliyatini boshlashi bilan yana ikki-besh hafta davomida bosqichma-bosqich bartaraf etiladi.
Bozor ishtirokchilari mavjud vaziyat yuk tashish stavkalarining yanada o‘sishiga olib keladi degan fikrda. Stavkalar iyun oyida ko‘tarilishni boshlaydi va ehtimol, “ushbu kechikishlar ta’sirida iyul oyida yanada o‘sishi mumkin”.
Izoh (0)