АҚШ Афғонистондан ўз қўшинларининг учдан бир қисмини олиб чиқиб кетди. Бу ҳақда мамлакат Марказий қўмондонлиги матбуот хизматига таяниб «РБК» хабар берди.
«АҚШ Марказий қўмондонлиги маълумотларига кўра, қўшинларни олиб чиқиш жараёнининг 30 фоиздан 44 фоизгача бўлган қисмини якунладик», — дейилади қўмондонлик баёнотида.
Марказий қўмондонликнинг аниқлик киритишича, АҚШ Афғонистондан 300 га яқин юк самолётларини олиб чиқиб кетган, 13 минг дона жиҳоз утилизация қилиш учун Мудофаа вазирлигининг моддий-техник таъминлаш агентлигига берилган. Бундан ташқари, АҚШ олтита объектни расмий равишда Афғонистон Мудофаа вазирлигига топширган.
Эслатиб ўтамиз, апрель ойида АҚШ президенти Жо Байден Афғонистондан Америка қўшинларини олиб чиқиб кетиш бошланганини эълон қилган эди. Унинг сўзларига кўра, ҳарбийлар минтақада уларнинг олдига қўйилган барча мақсадларга эришган. Қуролли Кучлар 11 сентябргача тўлиқ чиқариб кетилиши режалаштирилган. Америка ва НАТО мамлакатлари қўшинлари 29 апрелдан чиқиб кетишни бошлаган.
Оқ уй Америка президентининг маъмурияти Тинч океани йўналишига эътиборни жамлашни режалаштираётганини айтди. Айни вақтда АҚШ давлат котиби Энтони Блинкен Афғонистондан қўшинлар чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмади.
Изоҳ (0)