23 май куни Афинадан Вильнюсга учаётиб, Минскка шошилинч қўнган Ryanair рейси бортида бомба борлиги ҳақидаги хабар ҲАМАС ҳаракати томонидан юборилган. Бу ҳақда Беларусь Транспорт ва коммуникациялар вазирлигининг авиация департаменти директори Артём Сикорский маълум қилди, деб ёзади Meduza.
Сикорскийнинг сўзларига кўра, Минск миллий аэропорти электрон почтасига қуйидаги хат инглиз тилида келиб тушган:
«Биз, ҲАМАС аскарлари Исроил Ғазо секторида ўт очишни тўхтатишини талаб қиламиз. Европа Иттифоқи бу урушда Исроилни қўллаб-қувватлашдан воз кечишини талаб қиламиз. Delfi Economic Forum иштирокчилари 4978 рейси билан уйга қайтаётгани маълум. Бу самолётга бомба қўйилган. Агар сиз бизнинг талабларимизни бажармасангиз, бомба 23 май куни Вильнюс осмонида портлайди».
Сикорскийнинг айтишича, Беларусь диспетчерлари Ryanair самолёти экипажига ушбу хавф ҳақида хабар берган, шундан кейин экипаж Минск халқаро аэропортига қўниш ҳақида қарор қабул қилган. Мансабдор қайд этишича, «ҳаво кемасини қўндиришга қаратилган ҳеч қандай босим ёки мажбурлаш бўлмаган».
Ўз навбатида, Беларусь Қуролли Кучлари ҳаво ҳужумига қарши мудофаа қўшинлари ва ҳарбий-ҳаво кучлари қўмондони Игорь Голуб МиГ-29 қирувчи самолёти Ryanair экипажи самолётни Минск аэропорти томонга бурганидан кейингина ҳавога кўтарилганини айтди.
«Навбатчи экипаж Ryanair борти парвозини тўхтатди дейиш қонунга тўғри келмайди», — деди Голуб.
23 май куни Афинадан Вильнюсга йўл олган Ryanair авиакомпанияси самолёти Минск аэропортига шошилинч қўнди. Бу бортга бомба ўрнатилгани ҳақидаги хабардан кейин юз берди. Охир-оқибат у ёлғон бўлиб чиқди. Беларусь осмонида бортга МиГ-29 ҳарбий қирувчи самолёти ҳамроҳлик қилди.
Ryanair самолёти йўловчилари орасида Nexta мухолифатчи Telegram канали собиқ бош муҳаррири Роман Протасевич бор эди, Беларусда унга қарши бир қатор жиноят ишлари қўзғатилган. Протасевич ва унинг севгилиси, Россия фуқароси Софья Сапега аэропортда қўлга олинди.
20 май куни ҲАМАС ва Исроил ҳукумати икки ҳафта давом этган низолардан кейин ўт очишни тўхтатиш ҳақида келишувга эришган эди.
Delfi Economic Forum — Грециянинг нотижорат ташкилоти бўлиб, Европа ва Шарқий Ўрта Ер денгизи мамлакатларининг барқарор ва рақобатбардош бўлиб ўсиши» учун ғоялар қидиришни ўз мақсади сифатида илгари суради.
Мавзуга доир:
- Минскда Nexta мухолифатчи Telegram канали собиқ муҳаррири Роман Протасевич қўлга олинди. У учаётган самолёт бомба ҳақидаги хабар туфайли Беларусга фавқулодда қўндирилди. Қўниш ҳақидаги қарорни Лукашенконинг шахсан ўзи «Европани ҳимоя қилиш» учун қабул қилган
- Саккизта мамлакат Беларусь осмонидан учиб ўтишни тақиқлашни талаб қилди
- АҚШ давлат котиби Беларусдан Nexta портали собиқ раҳбарини озодликка чиқаришни талаб қилди
- Ryanair рейсининг Минскка мажбурий қўндирилиши Евроиттифоқ саммитида муҳокама қилинади. Авиакомпаниялар Беларусь устидан учишдан бош тортмоқда. Асосий маълумотлар
- Исроил ва ҲАМАС ўт очишни тўхтатиш ҳақида келишиб олди
Изоҳ (0)