Ҳиндистонда коронавирус туфайли қайд этилган ўлимлар сони бўйича антирекорд янгиланди. Мамлакатда COVID-19 асоратлари оқибатида вафот этганлар сони 300 минг нафардан ошиб кетди, дея хабар берган The Independent.
Ортда қолган бир сутка вақт давомида Ҳиндистонда COVID-19 билан касалланган 4454 нафар одам ҳаётдан кўз юмди. Мамлакат Соғлиқни сақлаш вазирлиги берган ахборотга кўра, ўлимлар сонининг кескин ошишига коронавирусга қарши вакцина етказиб берилишининг камайиб кетгани сабаб бўлган. Шунингдек, қора замбуруғ эпидемияси ҳам Ҳиндистондаги вазиятни янада оғирлаштирмоқда. Мамлакат коронавирус оқибатида вафот этган одамлар сони бўйича дунёда учинчи ўринга кўтарилди.
Қайд этилишича, сўнгги вақтларда коронавирус асоратлари оқибатида одамлар ҳалок бўлиши ҳолатларининг аксарияти миллионлаб аҳоли истиқомат қиладиган Мумбай ва Нью-Деҳли мегаполисларида кузатилган. Мамлакатнинг қишлоқ ҳудудларидаги эпидемиологик вазият ҳам чекка жойларда тиббиёт хизматларини кўрсатиш ачинарли аҳволда экани сабаб жуда оғир ҳолатда.
Аввал Ҳиндистонда қора замбуруғ (мукормикоз) билан касалланганлар сонининг 9 мингга яқинлашгани хабар қилинган. Мамлакатда одамларнинг замбуруғ юқтириб олиши COVID-19’дан кейинги акс таъсир ҳолатига айланган. Шифокорларнинг сўзларига кўра, муаммо коронавирусни даволашда фойдаланиладиган стероид воситаларда бўлиши мумкин. Касаллик коронавирусдан тузалганига 12-18 кун бўлган беморларда учрамоқда.
Мавзуга доир: Ҳиндистонда коронавирусга чалинган талаба 11 кун дарахтда яшаб, ўзини ўзи изоляциялади
Шунингдек, Ҳиндистон ҳукумати барча ижтимоий тармоқларга коронавируснинг «ҳиндча» штамми билан боғлиқ ёки унинг мавжудлигини назарда тутувчи барча контентларни ўчириб ташлаш илтимоси билан мурожаат йўллаган.
Изоҳ (0)