Конго демократик республикаси шарқида жойлашган Ньирагонго вулқони отилиши оқибатида ҳалок бўлганларнинг сони 15 нафарга етди. Бу ҳақда маҳаллий Actuality нашри хабар берган.
Маълумотларга кўра 9 киши Гома шаҳридан одамларни эвакуация қилиш вақтида юз берган ЙТҲда ҳалок бўлган. Шимолий Киву ҳудудидаги йўл ўртасида одамларни олиб кетаётган юк машинаси айланиб кетиши оқибатида автоҳалокат содир бўлган.
Яна тўрт нафар қурбон вулқон отилаётган вақтда Мунзензе қамоқхонасидан қочишга уринган маҳбуслар. Ҳалок бўлган яна икки нафар одам ҳақида маълумотлар берилмаган.
Шимолий Киву губернатори Конго армияси ва миллий полицияга Гома шаҳри хавфсизлигини таъминлаш, саросима вақтда ўғриликлар, безорилик ва эвакуация вақтида босқинчилик ҳаракатларининг содир бўлмаслигини назоратга олишни буюрган.
Вулқоннинг фаоллиги тўхтаганидан кейин одамлар аста-секин ўз уйларига қайтишни бошлаган. Табиий офат оқибатида вулқон уюмидан шимоли-шарқда жойлашган Гома шаҳри атрофидаги ҳудудларга зарар етган.
Аввалроқ мамлакат ҳукумати Ньирагонго вулқони фаоллашуви оқибатдиа беш киши ҳалок бўлганини хабар қилган. Хабарда Гома шаҳрида яшовчи фуқароларнинг эвакуация вақтида ҳалок бўлгани айтилганди.
https://twitter.com/i/status/1396640926441738241
Ньирагонго 22 май куни оқшомда ҳаракатга келган ва эртаси куни тонгда отилишдан тўхтаган. Лава оқими аэропорт чегарасидан 50 метр узоқликгача етиб борган.
Аввал май ойи бошида Исландияда зилзилалар натижасида ҳаракатга келган вулқон фаоллашгани, апрелда эса Кариб денгизининг Сент-Винсен оролида Ла-Суфриьер вулқони ҳаракатга келгани, у ердан фақат эмланганлар эвакуация қилингани ҳақида хабарлар берилганди.
Изоҳ (0)