Ўзбекистонга миллион дозадан иборат ўзбек—хитой вакцинасининг учинчи партияси олиб келинди

Тошкентга 18 май, сешанба куни ZF-UZ-VAC2001 вакцинасининг яна 1 миллион дозадан иборат навбатдаги партияси Хитойдан олиб келинди, деб хабар бермоқда Соғлиқни сақлаш вазирлиги матбуот хизмати.

Эслатиб ўтамиз, ZF-UZ-VAC2001 коронавирусга қарши янги рекомбинант вакцина бўлиб, Хитой Фанлар академияси Микробиология институти олимлари томонидан яратилган, Anhui Zhifei Longcom Biopharmaceutical Co.Ltd фармацевтика компанияси томонидан ишлаб чиқилган. Вакцинанинг клиник тадқиқотлари ўзбекистонлик олимлар билан ҳамкорликда олиб борилган.

Ушбу вакцинанинг миллион дозадан иборат дастлабки партияси Ўзбекистонга 27 март куни, шунча дозадан иборат иккинчи партияси эса 27 апрель куни олиб келинган. Соғлиқни сақлаш вазирлигининг қўшимча қилишича, 19 май куни шу вакцинадан яна 500 минг доза олиб келинади.

Инновацион ривожланиш вазирлиги ҳузуридаги Илғор технология марказининг лаборатория мудири Дилбар Долимованинг сўзларига кўра, маълум муддат вакциналар Хитойдан келтирилиши режалаштирилган. Лекин кейинчалик мазкур вакцинани Ўзбекистонда маҳаллийлаштириш мақсадида лаборатория ҳамда техник ва ишлаб чиқариш қувватларини инобатга олиб, Jurabek Laboratories МЧЖ қўшма корхонаси томонидан тақдим этилиши кўзда тутилган.

Ўзбекистонда тўрт кунлик дам олишдан сўнг яна коронавирусга қарши эмлаш тадбирлари бошланди. Соғлиқни сақлаш вазирлиги маълумотларига кўра, 17 майга қадар Ўзбекистонда коронавирусга қарши 1 346 761 доза вакцинадан фойдаланилди. Ушбу вакциналарнинг 62 фоизи, яъни 842 минг дозадан ортиғини ZF-UZ-VAC2001 ташкил қилмоқда. Шундан айни пайтгача 91 минг нафардан ортиқ фуқаролар ўзбек—хитой вакцинасининг 2-босқичи билан ҳам эмланган.

Хусусан:

• 65 ёш ва ундан юқори ёшдаги эмланувчилар — 195 549 доза,
• тиббиёт ходимлари — 146 841 доза,
• умумий ўрта таълим мактаблари ўқитувчилари — 236 134 доза,
• мактабгача таълим ташкилотлари ходимлари — 76 562 доза,
• сурункали касаллиги бор фуқаролар — 96 036 доза ZF-UZ-VAC2001 вакцинасини қабул қилган.