Президент Шавкат Мирзиёев раислигида ўтказилган йиғилишда давлат раҳбари вилоят ҳокимлари маҳаллий бюджет ҳисобидан тор доирадаги хизматлар йўлга қўйиладиган ҳудудий тиббиёт муассасаларини юқори технологик ускуналар ва тиббиёт воситалари билан таъминлашга масъул бўлишини таъкидлади. Бу ҳақда «Дарё» мухбири хабар бермоқда.
«Соғлиқни сақлаш вазири ўринбосари Улуғбек Собиров 17 та ихтисослашган марказлар директорлари билан бирга, икки ҳафта муддатда республика, вилоят ва туман шифохоналарида даволаш лозим бўлган касалликлар рўйхатини тасдиқлаб, қуйи бўғин шифокорлари малакасини оширишни бошласин.
Икки ой муддатда ихтисослашган марказларга Европа давлатлари, Корея, Россия, Туркиядан тиббиёт бошқаруви экспертлари жалб қилинади.
Шунингдек, икки ой муддатда хусусий тиббиёт ташкилотларига лицензия бериш тартиби соддалаштирилиб, жараёнлар тўлиқ рақамлаштирилади.
Умуман, Собировга ихтисослашган марказлар ва уларнинг филиаллари раҳбарларини лавозимга тайинлаш ва лавозимидан озод этиш, жиҳозлаш бўйича лойиҳалар ишлаб чиқиш, тендер ўтказиш ва шартнома тузиш, марказларга бюджет маблағлари ва ордерларни тақсимлаш ваколатлари берилади», – деди давлат раҳбари.
Бундан аввал Шавкат Мирзиёев тиббиёт тизимида 5 та йўналишда жиддий ўзгаришлар қилинишини айтгани, Шавкат Мирзиёев 20 та туманнинг тиббиёт бирлашмалари фаолиятини танқид қилгани ҳамда Шавкат Мирзиёев 1 июлдан бошлаб сурункали касалликларни бирламчи бўғинда даволаш бўйича янги тизим жорий этилишини маълум қилгани ҳақида хабар берилганди.
Изоҳ (0)