Шавкат Мирзиёев: «Тиббиёт соҳасидаги дарсликларнинг аксарияти халқаро стандартларга умуман жавоб бермайди»

2021 йилда ординатура ва магистратурада ўқиётган 30 нафар иқтидорли ёшлар нуфузли хорижий тиббиёт марказларига малака оширишга юборилади. Бу ҳақда 18 май куни Президент Шавкат Мирзиёев раислигида ўтказилган йиғилишда давлат раҳбари сўз юритди, дея хабар бермоқда «Дарё» мухбири.

«Соғлиқни сақлаш вазири Хожибоев вазирлик фаолиятини умумий бошқариш билан бир қаторда таълим, фан, инновация, кадрларни тайёрлаш ва қайта ўқитиш йўналишларида жиддий ўзгаришларни амалга ошириши зарур.

Мисол учун, тиббиёт соҳасидаги таълим услублари бундан 30-40 йиллар аввал тасдиқланган ва дарсликларнинг аксарияти халқаро стандартларга умуман жавоб бермайди.

Шунингдек, 11 та тиббиёт олийгоҳи ва 17 та ихтисослашган марказда жами 7 мингдан зиёд ходим ишласа-да, улардан бор-йўғи 336 нафари илмий иш қилмоқда, докторлик диссертацияси атиги 29 та. Оқибатда улардаги илмий салоҳият 34 фоизни ташкил этиб, айрим олийгоҳларда бу кўрсаткич камайиб бормоқда. Шу боис Хожибоев 11 та тиббиёт олийгоҳни трансформация қилиши зарур.

Бу ишларни Тошкент тиббиёт академиясида бошлаш, унга Европа ва бошқа ривожланган давлатлардан профессор-ўқитувчиларни жалб қилиш керак.

Бундан ташқари, академияда илғор хорижий тажриба асосида тиббиёт соҳасида бошқарувчилар ҳамда юқори технологик ускуналар билан ишлайдиган мутахассислар тайёрлаш бўйича янги йўналишларни ташкил этиши лозим.

Шунингдек, 2021 йилда ординатура ва магистратурада ўқиётган 30 нафар иқтидорли ёшларни нуфузли хорижий тиббиёт марказларига малака оширишга юборсин», – деди давлат раҳбари.

Президент бош вазир ўринбосари Беҳзод Мусаевга ушбу мақсадлар учун янги ташкил этилган жамғармадан маблағ ажратиш бўйича топшириқ берди.