Шавкат Мирзиёев: «Ўзбекистоннинг 26 та туманида соғлом турмуш тарзига амал қилмайдиган ва нотўғри овқатланадиган 352 минг нафар болалар аниқланган»

Ўзбекистондаги болалар ўртасидаги сурункали касалликларнинг 60 фоизи нотўғри овқатланишдан келиб чиқмоқда. Бу ҳақда айни пайтда Президент Шавкат Мирзиёев раислигида ўтказилаётган йиғилишда сўз юритилди, дея хабар бермоқда «Дарё» мухбири.

«26 та туман ва шаҳарда ўтказилган хатловда 242 минг нафар тез-тез касал бўладиган ва сурункали касаллиги бор болалар аниқланган. Бу умумий болалар сонининг 15 фоизини ташкил этади. Айниқса, ушбу кўрсаткич Каттақўрғон (19 фоиз), Гулистон, Урганч ва Термиз шаҳарлари (16 фоиз), Тўрақўрғон (18 фоиз), Урганч (17 фоиз) ва Оққўрғон туманларида (16 фоиз) анча юқори.

Бундан ташқари, ушбу 26 та туманда соғлом турмуш тарзига амал қилмайдиган, ортиқча вазнга эга бўлган, нотўғри овқатланадиган 352 минг нафар болалар аниқланган.

Оналар ва болаларни хавф гуруҳларига ажратиб, улар билан манзилли ишларни ташкил этишга масъул бўлган соғлиқни сақлаш вазири ўринбосари Элмира Боситхонова вилоят, туман ва шаҳар ҳокимларининг ўринбосарлари билан бирга, икки ой муддатда болаларда профилактика ва даволашнинг янги тизимини жорий этиши лозим.

Бунда, энг аввало, мактаб ва боғчаларда болаларнинг тўғри овқатланишини йўлга қўйиш, улар учун овқатланиш рационини ишлаб чиқиш зарур», – деди давлат раҳбари.

Бундан аввал Шавкат Мирзиёев хусусий тиббиёт ташкилотларига лицензия бериш тартиби соддалаштирилиб, жараёнлар тўлиқ рақамлаштирилиши, тиббиёт муассасаларини дори ва тиббиёт воситалари билан қўшимча таъминлашга 165 миллиард сўм ажратилиши ҳамда барча тиббиёт муассасаларида электрон тизим билан ишлайдиган 2 мингта ИТ-оператор–ҳамшира лавозими жорий этилишини маълум қилгани ҳақида хабар берилганди.