АҚШ президенти Жо Байденнинг маъмурияти Исроилга 735 миллион долларлик юқори аниқликдаги қурол-яроғ сотишни маъқуллади. Бу ҳақда The Washington Post ўз манбаларига таяниб хабар берди, деб ёзади «РБК».

Фаластин ўт ўчирувчилари Исроил авиазарбасидан кейин юзага келган катта ёнғинни ўчирмоқда

Фото: Global Look Press

Нашр манбалари тақдим этган маълумотларга кўра, конгресс бу ҳақда 5 май куни — Исроил армияси ва ҲАМАС ўзаро ракета зарбаларини бошлашидан бир неча кун аввал хабардор қилинган.

Ушбу партиянинг асосий қисмини GPS технологияси асосидаги ускуналар комплектларини ташкил қилиши мумкин, улар эркин тушадиган бомбаларни бошқариладиган бомбаларга айлантириш имконини беради. Бундай комплект — Joint Direct Attack Munition (JDAM) — бомбанинг ўрта қисмига маҳкамланадиган қанотлардан ҳамда бомбага манёвр қилиш имконини берувчи бошқарилувчи «патларга» эга дум қисмидан иборат.

Расман хабардор қилинганидан кейин қонун чиқарувчиларда битимнинг амалга оширилишига қарши норозилик ҳақида резолюция бериш учун 20 кун вақт бўлади. Бу ҳужжат юридик кучга эга эмас.

Туркия президенти Ражаб Тоййиб Эрдўғон Исроилга қурол сотиш ҳақидаги қарори учун америкалик ҳамкасби Жо Байденни танқид қилди.

«Жаноб Байден, афсуски, сиз тарихни қонга беланган қўлларингиз билан ёзяпсиз. Мана шу гапни айтишга бизни мажбур қилдингиз», — деди у Анқарадаги матбуот анжуманида АҚШ маъмурияти Исроилга қурол-яроғ сотишни маъқуллагани ҳақидаги хабарларни изоҳлар экан.

Эрдўғоннинг фикрича, айни пайтда Фаластиндаги фожиадан юз ўгираётган мамлакатлар «ўз зарарига бўлғуси муаммолар уруғларини сочмоқда».

Фаластин—Исроил низосининг 2014 йилдан буён кузатилган энг кучли авж олиши май ойида Исроил ҳукуматининг Қуддусда бир қатор араб оилаларини кўчириб юбориш қароридан кейин бошланди. Бу норозиликларни келтириб чиқарди ҳамда Қуддусда араб намойишчилар ва Исроил полицияси ўртасидаги тўқнашувларга сабаб бўлди.

Вазиятга ҲАМАС аралашди. Исроил унинг полицияни олиб кетиш ҳақидаги талабларини бажармаганидан кейин, гуруҳ ракеталар отишни бошлади. Бунга жавобан Исроил Ғазо секторини ўққа тутди.

Ғазо сектори зиддият кучайганидан буён 200 дан ортиқ фаластинлик ҳалок бўлиб, 5 мингдан зиёди жабрланганини маълум қилди. Исроил томони ўн нафар қурбон ва 50 га яқин оғир ярадорлар борлиги ҳақида хабар бермоқда.