Арманистон ҳудудига Озарбайжон ҳарбийлари киритилгандан кейин вужудга келган вазият натижалари бўйича икки давлат қуролли кучлари вакиллари ўртасидаги музокаралар 19 май куни давом эттирилади. Бу ҳақда Арманистон бош вазири вазифасини бажарувчи Никол Пашинянга таяниб, «Интерфакс» хабар берди.
«Кеча оқшомгача олиб борилган музокаралар чоршанба куни давом эттирилади. Музокараларнинг энг асосий мавзуси — Арманистон ҳудудидан Озарбайжон қуролли кучларини олиб чиқиш. Бу амалга ошгунига қадар биз вазиятга Арманистоннинг суверенитети, барқарорлиги, ҳудудий яхлитлигига таҳдид солувчи инқироз деб қараймиз», — деди Пашинян мамлакат хавфсизлик кенгашининг йиғилишида.
Унинг сўзларига кўра, бу ҳолат Коллектив хавфсизлик шартномаси ташкилоти (КХШТ) хартиясида, Коллектив хавфсизлик шартномаси тўғрисидаги битимда, КХШТ инқирозли вазиятларга жавоб бериш тўғрисидаги хартияда ифодаланган.
«Биз томонимиздан қўйилган қонуний талаб ҳал қилинмагунча ушбу механизмлар ва уларга параллел равишда арман-рус иттифоқи механизмларидан фойдаланиш зарур. Улар ўзи шундай вазиятлар учун ишлаб чиқилган», — деди Пашинян.
Шунингдек, Пашинян мавжуд вазиятни сиёсий жиҳатдан ҳал қилиб бўлмаса, «у ҳолда ҳарбий-сиёсий механизмларни қўллаш кераклигини» қайд этган.
У КХШТ шартномаси ва Арманистон–Россия келишувларида тегишли «функциялар кўзда тутилгани» ва «ушбу шартномалар айнан шундай ҳолатлар учун тақдим этилганини» ҳам айтиб ўтган.
«Биз қонуний ҳуқуқимиздан фойдаланиб, ушбу функцияларни ишга туширдик», — деган Пашинян.
Аввалроқ Арманистон–Озарбайжон чегарасидаги вазият туфайли Арманистон КХШТга мурожаат қилгани ҳақида хабар берилган. Пашинян Россия президентидан ҳарбий ёрдам ҳам сўраган эди.
Эслатиб ўтамиз, Арманистоннинг Сюник вилояти Горис шаҳри маъмурлари 2021 йил 12 май куни Озарбайжон ҳарбийлари томонидан республиканинг давлат чегараси бузилгани ҳақида хабар берди. Пашинян ҳодисани мамлакат суверенитетига тажовуз деб атади. Арманистон Бош прокуратураси 13 май куни мазкур ҳодиса юзасидан жиноий иш қўзғатди.
16 май куни Озарбайжон Ташқи ишлар вазирлиги матбуот котиби Арманистон суверенитетини бузиш ҳақидаги айбловларни асоссиз деб атади. Унинг сўзларига кўра, сўнгги ойларда томонлар ўртасида чегара масалаларида зиддиятлар юзага келган ва уларнинг барчаси музокаралар йўли билан тартибга солинган эди. Озарбайжоннинг фикрича, Арманистоннинг провокацион баёнотлари ушбу мамлакатдаги сайловолди вазият билан боғлиқ, дея қўшимча қилган ТИВ вакили.
16 майда Озарбайжон Арманистон билан чегарадаги кескинлик фонида ҳарбий машғулотлар ўтказишни ҳам бошлаган.
Изоҳ (0)