Ўзбекистоннинг мутасадди вазирлик ва идоралар ҳамда Саудия Арабистонининг Flynas авиакомпанияси ва Seera туристик агентлиги вакиллари ўртасида видеоконференция шаклидаги мулоқот бўлиб ўтди, деб хабар беради «Дунё» агентлиги.
Видеоконференцияда Саудия Арабистони подшоҳлиги делегациясининг 2021 йил январь ойида Ўзбекистонга ташрифи доирасида Бухоро шаҳрида ўтказилган бизнес-форумда Uzbekistan Airways АЖ ва Саудиянинг Flynas авиакомпанияси ўртасида туризмни ривожлантириш тўғрисида имзоланган англашув меморандумида белгиланган вазифаларнинг амалий натижалари хусусида фикр алмашилган. Шунингдек, Саудия Арабистонида Ўзбекистон туризм салоҳиятини кенг тарғиб этиш орқали саудияликларнинг мамлакатга саёҳатларини уюштириш истиқболлари муҳокама қилинган.
Маълум қилинишича, Flynas авиакомпанияси вакиллари 2021 йил 12 июндан бошлаб Ар-Риёд–Тошкент–Ар-Риёд йўналиши бўйича ҳафтасига уч марта мунтазам авиақатновлар амалга оширишни режалаштирмоқда.
Таъкидлаш керакки, 2020 йилда бошланган коронавирус пандемияси туфайли Саудия Арабистони ўз фуқароларини хорижга чиқиши бўйича вақтинча чекловлар ўрнатган эди. Айни пайтда мамлакат ҳукумати ўз фуқароларига коронавирус билан боғлиқ вазият яхшиланган давлатларга 17 майдан бошлаб сафар қилишга рухсат берган.
Қайд этилишича, Seera сайёҳлик компанияси саудияликларни Ўзбекистонга сафар қилиши учун турли тур-пакетларни таклиф қилмоқда. Компания вакиллари ушбу йўналишда Ўзбекистон туристик агентликлари билан яқин ҳамкорлик алоқаларини ўрнатишдан манфаатдорлигини таъкидлаган.
Видеоконференция якунлари бўйича томонлар Flynas парвозлари мунтазамлигини ҳисобга олиб, сайёҳлар оқимини кўпайтириш, Ўзбекистоннинг йирик туристик компания ва агентликлари вакилларини Саудия Арабистонига юбориш, Ўзбекистон туризм салоҳиятига бағишланган тақдимотлар ўтказиш каби қатор масалалар бўйича келишувга эришилган.
Аввалроқ Республика махсус комиссиясининг қарори билан Ўзбекистондан Ҳиндистон ва Туркияга, шунингдек, Японияга амалга ошириладиган авиақатновлар учун вақтинчалик чекловлар ўрнатилди.
Изоҳ (0)