Qatar va O‘zbekiston o‘rtasida to‘g‘ridan to‘g‘ri aviaqatnov yo‘lga qo‘yilishi kutilmoqda
O‘zbekiston bosh vaziri o‘rinbosari, Turizm va sport vaziri Aziz Abduhakimov Qatar aviatsiya idoralari delegatsiyasini qabul qildi, deb xabar bermoqda vazirlik matbuot xizmati.
Qayd etilishicha, delegatsiya O‘zbekiston va Qatar o‘rtasida havo qatnoviga doir hukumatlararo bitim tuzish, shuningdek, ikki mamlakat o‘rtasida to‘g‘ridan to‘g‘ri yo‘lovchi aviaqatnovlarni yo‘lga qo‘yish masalalarini ishlab chiqish maqsadida tashruf buyurgan.
Uchrashuvda Qatar fuqaro aviatsiyasi xizmati departamenti boshlig‘i Muhammad Faleh Alxajri O‘zbekistonning ulkan sayyohlik salohiyati hamda boy tarixiy-madaniy merosga egaligi Qatar fuqarolarida yuqori qiziqish uyg‘otishini ta’kidlab o‘tgan. Uning fikricha, O‘zbekiston bilan Qatar o‘rtasida havo qatnovi to‘g‘risidagi bitim imzolanishi ikki mamlakat o‘rtasidagi hamkorlik aloqalarini yanada faollashtirish, sayyohlik va ishbilarmonlik almashinuvini jadallashtirilishiga xizmat qiladi.
Qatar Airways departamenti rahbari Salam Al-Samarriy aviakompaniyaning O‘zbekistonga parvozlarni amalga oshirish va respublikaning mintaqaviy aeroportlarida joriy qilingan “ochiq osmon” rejimidan foydalanishga, jumladan, Fors ko‘rfazining boshqa mamlakatlaridan ham sayyohlarni jalb qilishga yuqori qiziqish bildirgan.
Vazirlik xabarida aytilishicha, uchrashuv yakunida tomonlar o‘zaro hamkorlik bitim loyihasi yuzasidan mavjud masalalarni tezkor hal etish, imzolash hamda hamkorlikni rivojlantirish, turizm sohasida yangi loyihalarni amalga oshirishga doir muloqotni davom ettirishga kelishib oldi.
Eslatib o‘tamiz, Jismoniy tarbiya va sport vazirligi hamda Turizmni rivojlantirish davlat qo‘mitasi negizida Turizm va sport vazirligi tashkil qilindi.
Avvalroq Ukraina aviakompaniyasi Toshkent va Kiyev o‘rtasida reyslarni tiklashni rejalashtirayotgani, Uzbekistan Airways Toshkentdan Moskvaga muntazam aviaqatnovlar tiklanganini ma’lum qilgani, Uzbekistan Airways may oyidan boshlab Rigaga aviaqatnovlarni qayta tiklashi haqida xabar berilgan edi.
