Андижонга келин бўлиб тушган аёлга 30 йилдан сўнг Ўзбекистон фуқаролиги берилди, деб хабар беради Олий Мажлис Сенати матбуот хизмати.
Андижонга келин бўлиб тушган Шоирахон Эгамова 30 йилдан буён фуқаролиги бўлмаган шахс мақомида яшаётгани, паспорти йўқлиги учун 10 йилдан бери бор-йўғи 100 километр нарида, Қирғизистонда яшовчи кекса онасини кўргани бора олмаслиги ҳақида Сенат раиси Танзила Норбоевага мурожаат қилганди.
Маълум қилинишича, мазкур мурожаат Сенатнинг Мудофаа ва хавфсизлик масалалари қўмитаси томонидан назоратга олинган ва ўрганишлар олиб борилган.
«Натижада Ўзбекистон Президентининг тегишли 11 майдаги фармонига мувофиқ Шоирахон Эгамова Ўзбекистон фуқароси сифатида қабул қилинди ва тез кунда фуқаролик паспортига эга бўлади», — дейилади хабарда.
Аввалроқ Ўзбекистон фуқаролигини олишда ўзбек тилидан имтиҳон топшириш пуллик бўлиши, Тошкентда 25 йил ҳеч қаерда қайд этилмаган йигитга фуқаролик паспорти берилгани ҳамда Ўзбекистон фуқаролигини олиш ва ундан воз кечиш жараёнлари онлайн режимга ўтказилиши ҳақида хабар берилганди.
Изоҳ (0)