O‘zbekistonning mutasaddi vazirlik va idoralar hamda Saudiya Arabistonining Flynas aviakompaniyasi va Seera turistik agentligi vakillari o‘rtasida videokonferensiya shaklidagi muloqot bo‘lib o‘tdi, deb xabar beradi “Dunyo” agentligi.
Videokonferensiyada Saudiya Arabistoni podshohligi delegatsiyasining 2021-yil yanvar oyida O‘zbekistonga tashrifi doirasida Buxoro shahrida o‘tkazilgan biznes-forumda Uzbekistan Airways AJ va Saudiyaning Flynas aviakompaniyasi o‘rtasida turizmni rivojlantirish to‘g‘risida imzolangan anglashuv memorandumida belgilangan vazifalarning amaliy natijalari xususida fikr almashilgan. Shuningdek, Saudiya Arabistonida O‘zbekiston turizm salohiyatini keng targ‘ib etish orqali saudiyaliklarning mamlakatga sayohatlarini uyushtirish istiqbollari muhokama qilingan.
Ma’lum qilinishicha, Flynas aviakompaniyasi vakillari 2021-yil 12-iyundan boshlab Ar-Riyod–Toshkent–Ar-Riyod yo‘nalishi bo‘yicha haftasiga uch marta muntazam aviaqatnovlar amalga oshirishni rejalashtirmoqda.
Ta’kidlash kerakki, 2020-yilda boshlangan koronavirus pandemiyasi tufayli Saudiya Arabistoni o‘z fuqarolarini xorijga chiqishi bo‘yicha vaqtincha cheklovlar o‘rnatgan edi. Ayni paytda mamlakat hukumati o‘z fuqarolariga koronavirus bilan bog‘liq vaziyat yaxshilangan davlatlarga 17-maydan boshlab safar qilishga ruxsat bergan.
Qayd etilishicha, Seera sayyohlik kompaniyasi saudiyaliklarni O‘zbekistonga safar qilishi uchun turli tur-paketlarni taklif qilmoqda. Kompaniya vakillari ushbu yo‘nalishda O‘zbekiston turistik agentliklari bilan yaqin hamkorlik aloqalarini o‘rnatishdan manfaatdorligini ta’kidlagan.
Videokonferensiya yakunlari bo‘yicha tomonlar Flynas parvozlari muntazamligini hisobga olib, sayyohlar oqimini ko‘paytirish, O‘zbekistonning yirik turistik kompaniya va agentliklari vakillarini Saudiya Arabistoniga yuborish, O‘zbekiston turizm salohiyatiga bag‘ishlangan taqdimotlar o‘tkazish kabi qator masalalar bo‘yicha kelishuvga erishilgan.
Avvalroq Respublika maxsus komissiyasining qarori bilan O‘zbekistondan Hindiston va Turkiyaga, shuningdek, Yaponiyaga amalga oshiriladigan aviaqatnovlar uchun vaqtinchalik cheklovlar o‘rnatildi.
Izoh (0)