Тожикистон Ички ишлар вазирлиги Қирғизистон оммавий ахборот воситаларининг Лахш туманида яшовчи этник қирғизлар депортацияси тўғрисидаги хабарларини рад этди. Вазирлик Қирғизистон веб-сайтларида тарқатилаётган маълумотларни ишончсиз ва ҳақиқатга зид деб атади.
«Қирғизистон ОАВлари маълумотида келтирилган фактлар ҳақиқатга тўғри келмайди. Лахш туманида ҳақиқатан ҳам икки фуқароликка эга этник қирғизлар яшайди. Бу нормал ҳолат. Бироқ паспорт назорати ҳеч қанақасига кучайтирилмаган ва Қирғизистон фуқаролари чиқариб юборилгани ҳам йўқ», — дейилади вазирлик хабарида.
Тожикистон Ички ишлар вазирлиги ОАВларни «шундоқ ҳам қийин бўлган вазиятни баттар авж олдирмасликка ва тасдиқланмаган маълумотларни тарқатмасликка» чақирди.
Мамлакат Ташқи ишлар вазирлиги ва Лахш тумани маъмурияти хабарлар юзасидан изоҳ бермаган.
Айни пайтда Қирғизистон ОАВлари Тожикистон Лахш туманининг Қирғизистон паспортига эга фуқароларини депортация қилишни бошлагани ҳақида ёзмоқда.
«Қирғизистон фуқаролигига эга бўлганлар аниқланиб, дарҳол вилоят марказига олиб борилмоқда. Улардан зудлик билан Қирғизистон паспортидан воз кечишни ва Тожикистон фуқаролигини олиш талаб қилинмоқда. Бунга рози бўлмаганлар Ўш вилоятининг Чон-Олай туманидаги «Карамик» назорат-ўтказиш пункти орқали Қирғизистонга депортация қилинмоқда. Уларга ҳатто нарсаларини йиғишга ҳам вақт берилмаяпти», — деб ёзган 24.kg агентлиги маҳаллий аҳолига мурожаат қилиб.
Лахш тумани Тожикистоннинг республикага бўйсунувчи туманлари таркибига киради. Ҳудуд 1931 йил 10 мартда, ўша вақтда ССР таркибига кирувчи Тожикистонда Жиргатал тумани сифатида ташкил этилган. 2016 йилда унинг номи Лахшга ўзгартирилди.
Туман шимолдан Қирғизистоннинг Боткен вилояти, шарқдан Ўш вилоятидаги Чон-Олой тумани билан чегарадош.
Аввалроқ Қирғизистон президенти Тожикистон билан можародан кейин чегарага боргани ҳақида хабар берилганди. Президент давлат чегарасининг қирғиз-тожик қисмида содир бўлган воқеалардан зарар кўрган қишлоқларга ташриф буюриб, маҳаллий аҳоли билан учрашувлар ўтказиши қайд этилган.
Шунингдек, Қирғизистон ва Тожикистон ўз қўшинларини давлат чегарасидан олиб чиқиб кетишни якунлагани, низо чоғида гаровга олинган ўн нафар Қирғизистон фуқароси Тожикистонда асирликдан озод этилгани ҳақида хабар берилган эди.
Изоҳ (0)