Туркманистонда уруш фахрийларига бериладиган совғалар учун уларнинг ўзларидан пул йиғиб олинмоқда
Туркманистонда икки йилдан буён уруш қатнашчилари ва фронторти фахрийларидан Ғалаба куни шарафига бериладиган совғалар учун пул йиғиб олинмоқда. Бу ҳақда Tengrinews хабар берди.
Маълум бўлишича, Лебап вилоятининг Фарап этрапида уруш ва фронторти фахрийларидан пул йиғилган. Фахрийларнинг маҳаллий маъмуриятга мурожаат қилган қариндошларининг сўзларига кўра, ҳукумат пул йиғилиши тўғрисида расмий тушунтириш бермаяпти.
«Ўтган йили Лебап фахрийлари 1000 манат (3 млн сўм) тўлашга ва керакли ижтимоий ҳимоя қоғозларини ўзлари расмийлашитирга мажбур бўлди. 2020 йилда Ғалабанинг 75 йиллиги шарафига фахрийларга юбилей медали топширилди. Медал учун ҳам ўнлаб маҳаллий фахрийлардан пул йиғилди», — деб ёзади агентлик.
Номаълум манбаларга кўра, фахрийларга топшириладиган совғалар йиғилган маблағларни оқламайди, чунки ҳукумат пулларнинг ярмини бошқа эҳтиёжлар учун ушлаб қолади.
Шу билан бирга, маҳаллий ҳокимият органлари совғанинг қиймати шаклланишига қараб, президент фармонига тайёргарлик кўради. Агар зарур бўлса, аёллар кенгаши аъзолари, касаба уюшмалари ва ҳарбий хизматчилардан қўшимча маблағ йиғиб олинади.
Туркманистонда Иккинчи Жаҳон уруши фахрийларига бериладиган пул ва қимматбаҳо совғалар миқдорига аниқлик киритилмаган. Аввалги йилларда уларга 9 май куни 200 манатдан (600 минг сўм) тўланган.
Қайд этилишича, Туркманистондаги фахрийларнинг мақоми аҳолини ижтимоий ҳимоя қилиш тўғрисидаги кодексда қонун билан мустаҳкамланган. Мамлакатдаги фахрийлар сони тўғрисида маълумот ҳозирча мавжуд эмас.
ASIA-Plus хабарига кўра, Тожикистонда Ғалаба кунининг 76 йиллиги муносабати билан Иккинчи Жаҳон уруши қатнашчиларининг ҳар бирига давлат раҳбарининг захира фондидан 10 минг сомоний (9,2 млн сўм) миқдорида бир марталик моддий ёрдам ажратилди.
Бундан ташқари, президент Тожикистоннинг барча туман, шаҳар ва вилоятлари раҳбарларига Иккинчи Жаҳон уруши қатнашчиларига маҳаллий бюджетлар ҳисобидан моддий ёрдам кўрсатишни топширди.
Тожикистон Соғлиқни сақлаш вазирлигининг маълумотларига кўра, ҳозирги пайтда мамлакатда 94 нафар уруш фахрийси яшайди. Бир ой олдин уларнинг сони 102 тани ташкил этган бўлса, 2020 йили 168 нафар фахрий Ғалаба кунини нишонлаган эди.
Иккинчи жаҳон уруши фронтларида 300 мингга яқин Тожикистон аҳолиси жанг қилган, шулардан 92 минг киши ҳалок бўлган ва бедарак йўқолган.
65 нафари Совет Иттифоқи Қаҳрамони унвони, 15 нафари уч даражали «Шон-шараф» ордени билан мукофотланган, жами 55 минг киши орден ва медалларга сазовор бўлган.
Аввалроқ, Душанбе ҳокими Рустам Эмомали пойтахтда яшовчи 16 нафар Иккинчи Жаҳон уруши фахрийларига бир ярим минг сомонийдан (1,3 млн сўм) топшириш ҳақида буюруқ берган эди.
Эслатиб ўтамиз, Россияда Иккинчи жаҳон уруши фахрийларига бериладиган мукофот пули Ўзбекистон ва Қозоғистондагига нисбатан бир неча баравар кам экани маълум бўлди. Россияда фахрийларга 9 май куни 10 минг рублдан (1,4 млн сўм) мукофот пули берилади. Ўзбекистонда бу пул 12 миллион сўмни ташкил этади (деярли 86 минг рубль), Қозоғистонда ҳокимият фахрийларга миллион тенге (175 минг рубль — 24,4 млн сўм) юборади.
