Tojikistondagi Qirg‘iziston elchisi Janish Rustenbekov 27-aprel kuni Tojikiston Tashqi ishlar vazirligiga (TIV) chaqirildi. Bu haqda TIV Axborot agentligiga tayanib, Asia Plus xabar berdi.
Foto: Sputnik
Agentlik xabariga ko‘ra, tashqi ishlar vazirining o‘rinbosari Muzaffar Husaynzoda qirg‘izistonlik diplomatga Qirg‘iziston Chegara xizmati vakillari Tojikistonning ikki nafar voyaga yetmagan fuqarosiga nisbatan noqonuniy xatti-harakatlari munosabati bilan nota topshirdi.
“Notada Qirg‘iziston Davlat chegara xizmati vakillari tomonidan Tojikistonning voyaga yetmagan ikki fuqarosiga nisbatan Isfara shahrining Vorux jamoati Kulik hududida noqonuniy xatti-harakatlar uyushtirgani yuzasidan Tojikistonning chuqur xavotiri bildirilgan”, — deyiladi xabarda.
27-aprel kuni Vorux jamoati ma’muriyati qirg‘iz chegarachilari “jamoatning ikki nafar maktab o‘quvchisini o‘g‘irlab ketdi va kaltakladi” deb xabar bergan. Qayd etilishicha, bolalar Vorux jamoatining Zaxmatobod mahallasi yaqinidagi yaylovda mol boqishgan, hudud Tojikistonga qarashli. Hodisadan bir soat o‘tibgina, tojik chegarachilarining aralashuvi bilan qirg‘iz harbiylari bolalarni qaytarib bergan.
Muzaffar Husaynzoda chegara zonasida keskinlikka olib keladigan bunday noqonuniy xatti-harakatlarga yo‘l qo‘yilmasligini aytdi. U Qirg‘iziston tomonini voqea uchun aybdorlarni javobgarlikka tortish uchun shoshilinch choralar ko‘rishga hamda Tojikistonni natijalardan xabardor qilishga chaqirdi.
“Tojikiston ikki qardosh xalqning an’analari va mushtarak ma’naviy va madaniy qadriyatlari asosida tinchlik, barqarorlik va o‘zaro hurmat sharoitida Qirg‘iziston bilan do‘stlik va yaxshi qo‘shnichilik munosabatlarini izchil rivojlantirish tarafdoridir”, — dedi Muzaffar Husaynzoda.
