Латвия Сейми (парламенти) 1915—1923 йилларда Усмонлилар империясидаги арманларнинг қирғин қилинишини қораловчи декларацияни қабул қилди. Бу ҳақда Meduza хабар берди.
«Усмонлилар империяси ҳокимиятининг хатти-ҳаракатлари натижасида кўплаб арманлар империянинг бошқа минтақаларига мажбуран депортация қилиниб, очлик, қийноқ ва қотиллик натижасида ҳалок бўлганини англаган ҳолда Сейм Усмонлилар империясининг арман халқига қарши суиқасд ва мажбурий кўчириш сингари жиноятларни қоралайди», — дейилади декларацияда.
Декларация Янги консерватив партия депутати Юрис Юраш ташаббуси билан Сеймнинг 40 нафар депутати томонидан тайёрланди.
LETA маълумотларига кўра, Сеймда бўлиб ўтган мунозаралар чоғида, депутат Роман Наудиньш Арманистон парламентини латишлар геноциди ва Болтиқбўйи давлатларининг ишғол этилишини ҳам тан олишга чақирди.
Туркия ташқи ишлар вазирлиги Латвия парламентининг қарорини қоралаб, қабул қилинган ҳужжатни «сиёсий сабабларга кўра тарихни қайта ёзишга бўлган маъносиз уриниш» деб атади. «Биз ушбу ҳалокатли ҳамда қонунга хилоф қарорни рад этамиз ва қатъиян қоралаймиз», — деди вазирлик.
Эслатиб ўтамиз, 24 апрель куни АҚШ президенти Жо Байден 20-аср бошларида Усмонлилар империясида содир этилган этник арманларнинг қирғинини геноцид деб расман тан олди. Анқара Америка раҳбарини популист деб атади ва унинг баёнотини рад этди. Туркия президенти Ражаб Тоййиб Эрдўғон Байденнинг арманлар геноциди ҳақидаги баёнотини адолатсиз деб атади.
Арманистон бош вазири Никол Пашинян эса Байденга миннатдорлик билдириб, АҚШ мазкур геноцидни тан олганидан кейин тарихда содир бўлган ушбу фожиа ўз расмий тасдиғини топганини таъкидлаган.
Турли хил ҳисоб-китобларга кўра, арманларга нисбатан қирғин пайтида 660 мингдан 1,5 миллионгача одам ўлдирилган. Туркия ҳам Озарбайжон сингари 1915 йил воқеаларини геноцид деб тан олмайди, аммо ушбу халқ орасида кўплаб қурбонлар бўлганини инкор этмайди. 2014 йилда Туркия бош вазири Ражаб Тоййиб Эрдўғон (амалдаги президент) мамлакат парламентида нутқ сўзлаб, ХХ аср бошларида арман миллатига қарши амалга оширилган оммавий қирғин натижасида ҳалок бўлганларнинг авлодларига илк бор ҳамдардлик билдирган эди.
Изоҳ (0)