Tojikiston Ichki ishlar vazirligi Qirg‘iziston ommaviy axborot vositalarining Laxsh tumanida yashovchi etnik qirg‘izlar deportatsiyasi to‘g‘risidagi xabarlarini rad etdi. Vazirlik Qirg‘iziston veb-saytlarida tarqatilayotgan ma’lumotlarni ishonchsiz va haqiqatga zid deb atadi.
“Qirg‘iziston OAVlari ma’lumotida keltirilgan faktlar haqiqatga to‘g‘ri kelmaydi. Laxsh tumanida haqiqatan ham ikki fuqarolikka ega etnik qirg‘izlar yashaydi. Bu normal holat. Biroq pasport nazorati hech qanaqasiga kuchaytirilmagan va Qirg‘iziston fuqarolari chiqarib yuborilgani ham yo‘q”, — deyiladi vazirlik xabarida.
Tojikiston Ichki ishlar vazirligi OAVlarni “shundoq ham qiyin bo‘lgan vaziyatni battar avj oldirmaslikka va tasdiqlanmagan ma’lumotlarni tarqatmaslikka” chaqirdi.
Mamlakat Tashqi ishlar vazirligi va Laxsh tumani ma’muriyati xabarlar yuzasidan izoh bermagan.
Ayni paytda Qirg‘iziston OAVlari Tojikiston Laxsh tumanining Qirg‘iziston pasportiga ega fuqarolarini deportatsiya qilishni boshlagani haqida yozmoqda.
“Qirg‘iziston fuqaroligiga ega bo‘lganlar aniqlanib, darhol viloyat markaziga olib borilmoqda. Ulardan zudlik bilan Qirg‘iziston pasportidan voz kechishni va Tojikiston fuqaroligini olish talab qilinmoqda. Bunga rozi bo‘lmaganlar O‘sh viloyatining Chon-Olay tumanidagi “Karamik” nazorat-o‘tkazish punkti orqali Qirg‘izistonga deportatsiya qilinmoqda. Ularga hatto narsalarini yig‘ishga ham vaqt berilmayapti”, — deb yozgan 24.kg agentligi mahalliy aholiga murojaat qilib.
Laxsh tumani Tojikistonning respublikaga bo‘ysunuvchi tumanlari tarkibiga kiradi. Hudud 1931-yil 10-martda, o‘sha vaqtda SSR tarkibiga kiruvchi Tojikistonda Jirgatal tumani sifatida tashkil etilgan. 2016-yilda uning nomi Laxshga o‘zgartirildi.
Tuman shimoldan Qirg‘izistonning Botken viloyati, sharqdan O‘sh viloyatidagi Chon-Oloy tumani bilan chegaradosh.
Avvalroq Qirg‘iziston prezidenti Tojikiston bilan mojarodan keyin chegaraga borgani haqida xabar berilgandi. Prezident davlat chegarasining qirg‘iz-tojik qismida sodir bo‘lgan voqealardan zarar ko‘rgan qishloqlarga tashrif buyurib, mahalliy aholi bilan uchrashuvlar o‘tkazishi qayd etilgan.
Shuningdek, Qirg‘iziston va Tojikiston o‘z qo‘shinlarini davlat chegarasidan olib chiqib ketishni yakunlagani, nizo chog‘ida garovga olingan o‘n nafar Qirg‘iziston fuqarosi Tojikistonda asirlikdan ozod etilgani haqida xabar berilgan edi.
Izoh (0)