Қирғизистон ва Тожикистон президентлари музокаралар ўтказди

Қирғизистон президенти Садир Жапаров ва Тожикистон президенти Эмомали Раҳмон 30 апрель куни икки мамлакат чегарасидаги вазиятни муҳокама қилди. Бу ҳақда Қирғизистон давлат раҳбарининг матбуот хизматига таяниб, «ТАСС» хабар берди.

«Давлат раҳбарлари икки мамлакат чегараларидаги вазиятни тезкор равишда бартараф этиш чораларини муҳокама қилди. Жапаров Қирғизистон томонининг давлатлараро муаммоларни тинч йўл билан ҳал қилиш ва давлат чегарасининг қирғиз-тожик қисмида барқарор вазиятни қўллаб-қувватлашини билдирди», — дейилади матбуот хизматининг хабарида.

Давлат раҳбарлари мавжуд вазиятни фақат тинчлик йўли билан ҳал қилишга ва шу йил май ойининг иккинчи ярмида Душанбе шаҳрида юзма-юз учрашув ўтказишга келишиб олди.

Чегараларни делимитация ва демаркация қилиш бўйича музокаралар

Қирғизистон ва Тожикистон чегараларни демаркация ва делимитация қилиш (музокаралар орқали чегараларни белгилаш) бўйича навбатдаги музокараларни 1 май куни ўтказади.

«Томонлар делегацияларининг қирғиз-тожик давлат чегарасини делимитация ва демаркация қилиш бўйича музокаралари эртага, 1 май куни Боткен вилояти (Қирғизистон) ҳудудида бўлиб ўтади», — дейилади икки мамлакат раҳбарлари ўртасидаги музокаралардан кейинги хабарда.

Маълумот учун, қирғиз-тожик давлат чегарасидаги вазият 29 апрель, пайшанба куни эрталаб кескинлашди: ўқотар қурол ишлатилган, Қирғизистон фуқаролари орасида ярадорлар ҳам бор. Қирғизистоннинг Боткен вилоятидаги Оқ-Сой, Оқ-Татир ва Самарқандек қишлоқларида Тожикистон билан чегарада юз берган ҳодиса муносабати билан фавқулодда вазият жорий қилинди.

Икки давлат чегарасидаги низо чоғида ҳалок бўлганлар сони 13 кишига етди. Аввалроқ ҳалок бўлганлар сони уч киши деб маълум қилинган, улар орасида 13 ёшли қизча борлиги, у касалхонага кетишда вафот этгани айтилган эди.

Кейинроқ Қирғизистон прокуратураси мамлакат Жиноят кодекси 380-моддаси (тинчликка қарши қаратилган жиноят) бўйича судгача бўлган процессни бошлади. Идора Тожикистонни ҳарбий тажовузда, шунингдек, халқаро шартнома ва келишувларни бузишда айблаган.

Боткен вилояти Ички ишлар бошқармаси матбуот котиби Дамира Юсупова Қирғизистоннинг Боткен вилояти Лайлак тумани Интернационал қишлоқ кенгаши раҳбари Тожикистон фуқаролари томонидан гаровга олингани ҳақида маълум қилди.

Шунингдек, Боткен вилояти раҳбарининг ўринбосари Маъруфхон Тулаев 30 апрель куни Тожикистон хавфсизлик кучлари Боткен вилоятининг Қизил-Бел қишлоғига ҳужум қилганини айтди. «Тахминан, 20 дақиқа олдин Тожикистон хавфсизлик кучлари қирғиз қишлоғига гранатомётлардан ўқ узди. Ҳозир биз вазиятга аниқлик киритмоқдамиз», — деди Тулаев.

30 апрель куни эрталаб Қирғизистон президенти Тожикистон билан чегарадаги вазият барқарорлашганини хабар қилди.