Qirg‘iziston va Tojikiston prezidentlari muzokaralar o‘tkazdi

Qirg‘iziston prezidenti Sadir Japarov va Tojikiston prezidenti Emomali Rahmon 30-aprel kuni ikki mamlakat chegarasidagi vaziyatni muhokama qildi. Bu haqda Qirg‘iziston davlat rahbarining matbuot xizmatiga tayanib, “TASS” xabar berdi.

“Davlat rahbarlari ikki mamlakat chegaralaridagi vaziyatni tezkor ravishda bartaraf etish choralarini muhokama qildi. Japarov Qirg‘iziston tomonining davlatlararo muammolarni tinch yo‘l bilan hal qilish va davlat chegarasining qirg‘iz-tojik qismida barqaror vaziyatni qo‘llab-quvvatlashini bildirdi”, — deyiladi matbuot xizmatining xabarida.

Davlat rahbarlari mavjud vaziyatni faqat tinchlik yo‘li bilan hal qilishga va shu yil may oyining ikkinchi yarmida Dushanbe shahrida yuzma-yuz uchrashuv o‘tkazishga kelishib oldi.

Chegaralarni delimitatsiya va demarkatsiya qilish bo‘yicha muzokaralar

Qirg‘iziston va Tojikiston chegaralarni demarkatsiya va delimitatsiya qilish (muzokaralar orqali chegaralarni belgilash) bo‘yicha navbatdagi muzokaralarni 1-may kuni o‘tkazadi.

“Tomonlar delegatsiyalarining qirg‘iz-tojik davlat chegarasini delimitatsiya va demarkatsiya qilish bo‘yicha muzokaralari ertaga, 1-may kuni Botken viloyati (Qirg‘iziston) hududida bo‘lib o‘tadi”, — deyiladi ikki mamlakat rahbarlari o‘rtasidagi muzokaralardan keyingi xabarda.

Ma’lumot uchun, qirg‘iz-tojik davlat chegarasidagi vaziyat 29-aprel, payshanba kuni ertalab keskinlashdi: o‘qotar qurol ishlatilgan, Qirg‘iziston fuqarolari orasida yaradorlar ham bor. Qirg‘izistonning Botken viloyatidagi Oq-Soy, Oq-Tatir va Samarqandek qishloqlarida Tojikiston bilan chegarada yuz bergan hodisa munosabati bilan favqulodda vaziyat joriy qilindi.

Ikki davlat chegarasidagi nizo chog‘ida halok bo‘lganlar soni 13 kishiga yetdi. Avvalroq halok bo‘lganlar soni uch kishi deb ma’lum qilingan, ular orasida 13 yoshli qizcha borligi, u kasalxonaga ketishda vafot etgani aytilgan edi.

Keyinroq Qirg‘iziston prokuraturasi mamlakat Jinoyat kodeksi 380-moddasi (tinchlikka qarshi qaratilgan jinoyat) bo‘yicha sudgacha bo‘lgan protsessni boshladi. Idora Tojikistonni harbiy tajovuzda, shuningdek, xalqaro shartnoma va kelishuvlarni buzishda ayblagan.

Botken viloyati Ichki ishlar boshqarmasi matbuot kotibi Damira Yusupova Qirg‘izistonning Botken viloyati Laylak tumani Internatsional qishloq kengashi rahbari Tojikiston fuqarolari tomonidan garovga olingani haqida ma’lum qildi.

Shuningdek, Botken viloyati rahbarining o‘rinbosari Ma’rufxon Tulayev 30-aprel kuni Tojikiston xavfsizlik kuchlari Botken viloyatining Qizil-Bel qishlog‘iga hujum qilganini aytdi. “Taxminan, 20 daqiqa oldin Tojikiston xavfsizlik kuchlari qirg‘iz qishlog‘iga granatomyotlardan o‘q uzdi. Hozir biz vaziyatga aniqlik kiritmoqdamiz”, — dedi Tulayev.

30-aprel kuni ertalab Qirg‘iziston prezidenti Tojikiston bilan chegaradagi vaziyat barqarorlashganini xabar qildi.