Бутун дунёда пандемия бошидан буён 150 551 424 киши коронавирусни юқтириб олган. Бу ҳақда Жонс Ҳопкинс университети маълумотлари гувоҳлик бермоқда. Сўнгги уч ой ичида касалланганлар сони 50 миллионга ошган: 100 миллион кишилик маррадан 26 январь куни ўтилган эди.
Инфекцияни юқтирганлар сони бўйича АҚШ (32,2 миллион), Ҳиндистон (18,7 миллион), Бразилия (14,5 миллион), Франция (5,6 миллион) ва Туркия (4,7 миллион) етакчилик қилмоқда. Юқори ўнликдан, шунингдек, Россия (4,7 миллион), Буюк Британия (4,4 миллион), Италия (4 миллион), Испания (3,5 миллион) ва Германия (3,3 миллион) ҳам ўрин олди.
Дунё бўйлаб коронавирус оқибатидаги ўлимлар сони эса 3 166 697 тага етди.
Мавзуга доир:
Хитой, Франция, Руминия ва Исроилда «ҳиндча» штамм аниқланди
Коронавируснинг «ҳиндча» вариант билан касалланиш ҳолатлари Руминия, Исроил, Франция ва Хитойда қайд этилди. Руминия Соғлиқни сақлаш вазирлиги маълум қилишича, мамлакатда COVID-19’нинг янги штаммини юқтириш ҳолати биринчи марта 26 ёшли беморда тасдиқланган, у Руминияга бир ойча аввал кириб келган. Шу муносабат билан ҳукумат яқинда Ҳиндистондан келган қурувчилар орасида коронавирус авж олишини текширмоқда.Шунингдек, инфекциянинг «ҳиндча» вариантига чалиниш билан боғлиқ битта ҳолат Франция жануби-ғарбидаги Ло ва Гарона департаментида аниқланган. Бемор мамлакатга яқинда Ҳиндистондан қайтиб келган. Ҳудуд раҳбарияти саёҳатчига ўз-ўзини яккалаш мажбуриятини юклаб, у мулоқот қилган одамлар орасида катта кўламли текширув бошлади.
Ўз навбатида, Исроил ССВ мамлакатда қайд этилган «ҳиндча» штамм билан боғлиқ 41 та ҳолат ҳақида маълум қилди. Инфекцияни юқтирганларнинг тўрт нафари COVID-19’га қарши эмланган бўлган.
Янги штамм билан касалланганларнинг 24 нафари яқинда чет элдан қайтиб келган, қолган 17 нафари мамлакат ичида вирусга чалинган.
Шунингдек, Хитойда ҳам коронавируснинг «ҳиндча» штаммига чалиниш ҳолатлари кузатилди. Ушбу вариант бирйўла бир нечта шаҳарларда аниқланган.
Мавзуга доир: Ҳиндистонда коронавируснинг қўшмутацияли тури аниқланди
Францияда COVID-чекловларнинг барчаси июнь охирига келиб бекор қилинади
Франция президенти Эммануэль Макрон коронавирус пандемияси туфайли киритилган чекловларни босқичма-босқич бекор қилиш режасини тақдим этди. Унга кўра, чекловлар 3 майдан 30 июнга қадар тўрт босқичда олиб ташланади.3 май куни фуқароларнинг ҳаракатланиши ҳамда бошқа ҳудудларга сафарларга чекловлар бекор қилинади. Катта синф ўқувчилари ва талабалар қатнаб ўқишни бошлайди.
19 майдан комендантлик соати 2 соатга қисқаради (21:00 дан бошланади). Дўконлар, музей, театр ва кинотеатрлар, шунингдек, кафелар айвонлари очилади, аммо баъзи чекловлар сақланиб қолади.
9 июндан комендантлик соати яна 2 соат орқага сурилади (23:00 дан бошланади), шунингдек, кўнгилочар ва бошқа муассасалар очилади.
30 июнда эса Францияда комендантлик соати бекор қилинади. Бироқ ўзи билан сертификат олиб юриш мажбурияти сақланиб қолади.
Шунингдек:- Жаҳон соғлиқни сақлаш ташкилоти (ЖССТ) Европани коронавирус чекловларини шошма-шошарлик билан бекор қилиш оқибатлари ҳақида огоҳлантирди. ЖССТнинг Европа бўлинмаси раҳбари Ханс Клюгенинг сўзларига кўра, Европанинг кўплаб мамлакатлари шу ҳафта чекловларни юмшатишни бошлашни режалаштирмоқда, ваҳоланки, янги ҳолатларнинг ўсиши эндигина пасайишни бошлаган. «Чеклов чораларининг жуда тез бекор қилиниши ҳар қандай мамлакатда кучли бўронга олиб келиши мумкин», — деди у.
- ЖССТ раҳбари Тедрос Гебрейесуснинг маълум қилишича, айни пайтгача дунёда 1 миллиарддан ортиқ дозада коронавирусга қарши вакцина билан эмланган, аммо шуларнинг 82 фоизи даромади юқори ёки ўртачадан баландроқ бўлган мамлакатларда қабул қилинган, 0,3 фоизи эса даромад даражаси паст бўлган мамлакатларда эмланган. Гебрейесус COVID-19’га қарши вакцина тақсимотидаги тенгсизликни пандемиянинг бош муаммоларидан бири деб атади.
Изоҳ (0)