Қирғизистоннинг Боткен вилояти Лайлак тумани Интернационал қишлоқ кенгаши раҳбари Тожикистон фуқаролари томонидан гаровга олинди. Бу ҳақда Боткен вилояти Ички ишлар бошқармаси матбуот котиби Дамира Юсупова «Интерфакс»га маълум қилди.
Юсупованинг сўзларига кўра, қирғиз-тожик чегарасида вазият кескинлигича қолмоқда. Лайлак туманида Тожикистон ҳарбий хизматчиларига тегишли ҳарбий техника пайдо бўлган, улар «Интернационал қишлоғидаги қирғизистонликларнинг уйларига бостириб кирган».
«Лайлак тумани ИИБ томонидан тинчликка қарши жиноят моддаси бўйича иш очилди», — дея қўшимча қилди Юсупова.
Шунингдек, Боткен вилояти раҳбарининг ўринбосари Маъруфхон Тулаев 30 апрель куни Тожикистон хавфсизлик кучлари Боткен вилоятининг Қизил-Бел қишлоғига ҳужум қилганини айтди. «Тахминан, 20 дақиқа олдин Тожикистон хавфсизлик кучлари қирғиз қишлоғига гранатомётлардан ўқ узди. Ҳозир биз вазиятга аниқлик киритмоқдамиз», — деди Тулаев.
Унинг қўшимча қилишича, Боткен вилоятидаги чегара ҳудудидан 20 мингдан ортиқ Қирғизистон фуқароси эвакуация қилинган. «Лайлак туманининг чегарадош қишлоқларидан 13,5 минг киши эвакуация қилинган, яна 7 093 киши Боткен вилоятидан Боткен шаҳрига кўчирилган. Эвакуация қилинганларга маҳаллий фуқаро мудофааси хизматлари ёрдам бермоқда, шу билан бирга гуманитар ёрдам юборилади», — деди Тулаев.
Қирғизистон Миллий хавфсизлик давлат қўмитаси чегарадаги қуролли тўқнашувлар пайтида уч қирғиз чегарачиси ҳалок бўлгани ҳақида хабар берди. Шунингдек, 22 нафар ҳарбий хизматчи турли даражадаги тан жароҳати олган. Икки ҳарбий хизматчининг аҳволи оғир деб баҳоланмоқда.
Asia-Plus агентлиги хабар беришича, тожик-қирғиз чегарасидаги можаро пайтида олдинги чизиқда бўлган Тожикистоннинг Исфара шаҳар ҳокими ўқ еб жароҳат олганидан сўнг операция қилинди.
«29 апрель куни елкасидан ўқ еб жароҳати олган Исфара шаҳар ҳокими Баҳовуддин Баҳодирзода жарроҳлик амалиётини ўтказди. Операция муваффақиятли ўтди. Ҳозирда шаҳар ҳокими касалхонада, қачон чиқарилиши ҳали номаълум. Унинг аҳволи барқарор деб баҳоланмоқда», — дейилади агентлик хабарида.
Хабарга кўра, 30 апрель куни эрталаб Сўғд раҳбари Ражаббой Аҳмадзода Исфара шаҳар марказий касалхонасига ташриф буюриб, кечаги тўқнашувлар пайтида жабрланганларнинг аҳволини сўради, аммо ярадорларнинг аниқ рақамни айтмади. Таъкидланишича, ярадорлар сонини аниқлаш бўйича статистика мамлакат Соғлиқни сақлаш вазирлиги ҳузуридаги махсус тузилган штаб томонидан юритилади.
Ҳозирча Тожикистон ҳукумати чегарадаги қуролли тўқнашув пайтида ҳалок бўлганлар ва жароҳат олганлар тўғрисида расмий маълумот бермаган.
Asia-Plus манбаларига таяниб хабар беришича, Сўғднинг Исфара шаҳри ва Бобожон Ғофуров туманида 30 апрель куни эрталаб тўқнашувлар пайтида 90 дан ортиқ Тожикистон фуқаролари жароҳат олган, 10 га яқини ўлдирилган.
Қирғизистон Соғлиқни сақлаш вазирлигининг сўнгги маълумотларига кўра, можарода жабрланган қирғизистонликлар сони 134 кишига етди, 13 киши вафот этди.
Қирғизистон ва Тожикистон чегарасидаги низо 28 апрель куни маҳаллий аҳоли ўртасидаги жанжал билан бошланган эди. У эса тожикистонлик ҳарбийлар баҳсли ҳудудда жойлашган «Головной» сув тақсимлаш пункти яқинидаги электр устунига видеокузатув камераларини ўрнатганидан кейин келиб чиққан.Қирғизистон чегара хизматининг ахбороти бўйича 29 апрелда икки давлат ҳарбийлари ўртасида отишма содир бўлган. Идора тожик томонининг миномёт ҳисоб-китоб позицияларини эгаллашни ташкиллаштираётганини қайд этган.
30 апрель куни эрталаб, Қирғизистон президенти Тожикистон билан чегарадаги вазият барқарорлашганини маълум қилган эди.
Изоҳ (0)