АҚШнинг Шимолий Каролина штатидаги отишма натижасида энг камида беш киши ҳалок бўлди, деб хабар берди Fox News телеканали.
Таъкидланишича, қурбонлар орасида округ нозирининг икки ўринбосари, икки нафар фуқаро ва ўт очишда гумонланаётган шахс бор.
Қуролланган шахс одатдаги текширув учун келган полиция ходимларига қарата ўқ узганидан кейин, отишма юзага келди ва қарама-қаршилик 13 соатдан ортиқ давом этди. Атрофдаги маҳаллий аҳоли эвакуация қилиниб, баъзиларга яшириниш буюрилди.
Воқеа натижасида одамлар вафот этганидан кейин, отишма содир бўлган округнинг нозирлик идораси олдидаги байроқлари туширилди. Маҳаллий аҳоли қурбонлар хотираси учун воқеа жойига гуллар ва шамлар олиб келмоқда.
Аввалроқ АҚШнинг Шимолий Каролина штатидаги Элизабет-Сити шаҳрида афроамерикаликнинг полициячи томонидан ўлдирилгани сабабли фавқулодда ҳолат эълон қилинди.
Маълумот учун, АҚШнинг Огайо штати Колумбус шаҳрида полиция ходими 16 ёшли қора танли қизни отиб ўлдирди. Бунга жавобан полиция биноси олдида намойишчилар тўпланишни бошлади.
Қайд этилишича, ушбу ҳодиса, тахминан, қора танли америкалик Жорж Флойдни бўғиб ўлдирган собиқ полициячига ҳукм эълон қилинган вақтда содир бўлган. Суд ҳайъати Миннеаполис шаҳрининг собиқ полициячиси Дерек Шовинни афроамерикалик Жорж Флойдни эҳтиётсизлик орқасида одам ўлдиришда айбдор деб топди. Суддан кейин Шовин Миннесота штатидаги Оук-Парк-Хайц ахлоқ тузатиш муассасасига жойлаштирилди.
Шунингдек, АҚШнинг Миннесота штатидаги Бруклин-Сентер шаҳрида яна бир қора танли йигит полициячилар томонидан ҳибсга олиниш пайтида ўлдирилди. Шундан сўнг шаҳарда норозилик намойишлари бошланган. Шунингдек, АҚШда полициячи шифохонага ётқизилган қора танли эркакни отиб қўйган эди.
Эслатиб ўтамиз, Бундан аввал 2020 йилнинг май ойида Миннесота штатида қора танли америкалик Жорж Флойд полиция томонидан ҳибсга олинаётганда полициячи уни ерга ётқизиб, тиззаси билан узоқ вақт бўйнини босиб туриши оқибатида ўлганди. Бунинг ортидан мамлакат бўйлаб ҳуқуқ-тартибот органлари шафқатсизлиги ва ирқий тенгсизликка қарши оммавий норозилик намойишлари авж олди ва Black Lives Matter («Қора танлиларнинг ҳаёти муҳим») ҳаракати пайдо бўлди. АҚШда ушбу норозиликлар фонида тартибсизликлар бошланган, полиция ва намойишчилар ўртасида тўқнашув ҳам бўлганди.
Изоҳ (0)