AQShning Texas shtati Xyuston shahrida politsiyachilar tomonidan gumonlanuvchi tarzida hisbga olingan vaqtida qiynoqqa solingan va keyin kasalxonada vafot etgan, o‘limi mamlakatda norozilik namoyishlari boshlanishiga sabab bo‘lgan afroamerikalik Jorj Floydning dafn marosimi o‘tkazildi. Bu haqda CNN xabar qilgan.

Foto: Getty Images

Floydning jasadi u tug‘ilgan shaharga olib kelindi. Vidolashuv The Fountain of Praise cherkovida o‘tkazildi, bu yerda Baptist ruhoniysi va qora tanlilar huquqlari himoyachisi kichik Alfred Charlz Sharpton nutq so‘zlagan.

AQSh sobiq vitse-prezidenti va Donald Trampning saylovlardagi asosiy raqibi, demokrat Jo Bayden ham marosim uchun videomurojaat yozgan.

Vidolashuvdan keyin tobut Houston Memorial Gardens qabristoniga politsiya mashinalari hamrohligida eltib qo‘yildi. Qabristongacha bir milya masofa qolganida tobut maxsus ot aravaga o‘tkazilgan. Floyd onasi yoniga dafn qilindi.

Jorj Floyd Minneapolis shahridagi (Minnesota shtati) kasalxonada politsiyachilardan biri tizzasi bilan uning bo‘ynini yerga bosib turganidan keyin vafot etgan.

Afroamerikalikning o‘limi dastlab Minnesotada norozilik namoyishlari va to‘polonlar boshlanishi, keyinchalik ularning AQShning boshqa hududlari hamda xorij davlatlarida davom etishiga olib kelgan. Oqibatda minglab odamlar qamoqqa olinib, yuzlab insonlar turli tan jarohatlari orttirib olgan.

Ushbu voqeadan keyin Minneapolis, Vashington va Nyu-Yorkda mahalliy hukumatlar politsiya faoliyatini isloh qilish yoki ularni moliyalashtirishni qisqartirishni taklif etdi. Tramp bunga javoban moliyalashtirish kamaytirilmasligi, politsiya xodimlari soni ham qisqartirilmasligini ta’kidladi.

Quyida “RBK” nashri tomonidan Xyustonda o‘tgan vidolashuv marosimi haqidagi fotogalereyani e’tiboringizga havola qilamiz.

Jorj Floydning dafn marosimi u voyaga yetgan Texas shtatidagi Xyuston shahrida o‘tkazildi. U onasining qabri yoniga qo‘yildi.

Foto: AP Photo

So‘nggi vidolashuv marosimi The Fountain of Praise cherkovida bo‘lib o‘tdi. Prezidentlikka demokratlardan nomzod, sobiq vitse-prezident Jo Bayden marosim uchun videomurojaat yozgan.

Foto: Getty Images

Shuningdek, afroamerikaliklar huquqlari himoyachisi El Sharpton (suratda tobutning o‘ng tomonida) ham nutq so‘zlagan.

Foto: Reuters

Qabristonga yaqin qolganida tobut ot aravaga o‘tkazilmoqda.

Foto: Reuters

Dafn marosimida Xyuston politsiyasi rahbari Art Achevedo (suratda o‘ng tomonda) ham ishtirok etgan.

Foto: Getty Images

Suratda odamlar Floydning tobuti ortilgan ot aravani Houston Memorial Gardens qabristoniga kuzatib qo‘ymoqda.

Foto: Reuters

Jorj Floyd 25-mayda politsiyachilar tomonidan qo‘pol tarzda qo‘lga olingani oqibatida kasalxonaga tushgan va u yerda hayotdan ko‘z yumgan. Uni qalbaki pullar ishlatganlikda ayblashgan. Floyd nafas olishga qiynalayotganini aytganiga qaramay politsiyachi ko‘chada uni tizzasi bilan bo‘g‘ishda davom etgan.

Foto: Getty Images

Uni hibsga olishayotgan vaqtda guvohlar voqeani tasvirga tushirgan. Floydning o‘limi butun mamlakatda norozilik aksiyalarining boshlanishiga sabab bo‘ldi. Namoyishlarning ma’lum qismi tinchlik yo‘li bilan, qolgani esa to‘s-to‘polonlar, ko‘chalardagi tartibsizliklar bilan o‘tdi.

Foto: Getty Images

Qora tanlilarni qo‘llab-quvvatlashga qaratilgan namoyishlar boshqa xorij mamlakatlarida ham o‘tkazilgan.

Foto: Getty Images

Floydning o‘limiga sababchi bo‘lgan politsiyachilar ishdan haydalgan va ularga nisbatan ayblovlar e’lon qilingan.

Foto: Getty Images

Foto: EPA