Жонс Ҳопкинс университети маълумотларига кўра, дунёда коронавирусга чалинганлар сони 149 647 719 кишига етди. Касалланганлар сони бўйича АҚШ (32,2 миллион), Ҳиндистон (18,3 миллион), Бразилия (14,5 миллион), Франция (5,6 миллион) ва Туркия (4,7 миллион) етакчилик қилмоқда. Шунингдек, COVID-19 оқибатидаги ўлимлар сони 3 151 397 тани ташкил қилмоқда.
Жаҳон соғлиқни сақлаш ташкилотининг Панамерика минтақавий бўлинмаси раҳбари Карисса Этьен маълум қилишича, коронавирус пандемияси ҳали якунлангани йўқ. Аксинча, COVID-19 тарқалиш суръатларининг ошиши қайд этилмоқда.
«Бизнинг минтақамиз ҳамон бу пандемия қамровида қолмоқда… Жанубий Американинг бир нечта мамлакатларида шу йилнинг илк тўрт ойидаги вазият 2020 йилдагига нисбатан янада ёмонроқ бўлди. Бу шуни кўрсатадики, биз бу пандемияни фақат вакциналардан тезкор ва адолатли тарзда фойдаланиш ҳамда самарали профилактика чораларини биргаликда қўлласаккина енгиб ўтишимиз мумкин. Бу пандемия ҳали тугаш у ёқда турсин, тезлашяпти», — деди Этьен.
Коронавирус билан касалланганлар ёки унга қарши вакцина олганлар, тахминан, ҳар ярим йилда антитаналар даражасини текширтириб туриши керак, деди инфекционист-шифокор, тиббиёт фанлари доктори Николай Малишев.«Шуни эсда тутиш керакки, антитаналар абадий эмас. 5—6 ойдан кейин иммунитет тушиб кетиши ҳақида қачонлардан буён айтилади. Ҳақиқатан ҳам, касалликдан кейин ярим йил ўтиб, антитаналар миқдорини текшириб кўриш ва бир неча ойда бир марта бу таҳлилни қайтариб туриш мумкин», — деди Малишев.
Унинг сўзларига кўра, буни битта лабораториянинг ўзида амалга ошириш керак, чунки турли лабораторияларда тест тизимлари турлича бўлиб, кўрсаткичлар ҳам турлича чиқади.
Испания ҳукумати июндан, коронавирусга қарши эмланганлик тўғрисидаги умумевропа рақамли сертификати жорий қилинганидан кейин, хорижлик саёҳатчилар учун мамлакатни очиб қўйишни режалаштирмоқда. Бу ҳақда Испания туризм вазири Фернандо Вальдес маълум қилди.Унинг сўзларига кўра, дастлаб сайёҳлар май ойидаёқ «синов режими»да киритила бошлайди ва шу тариқа июндаги вазият прогноз қилинади.
«Испания июнда бутун дунёдаги саёҳатчиларга ташриф учун очилганини хабар қилишга тайёр бўлади», — деди Вальдес.
Унинг қўшимча қилишича, Евроиттифоққа кирмайдиган мамлакатлардан келадиган сайёҳларнинг ҳар қандай киритилиш схемаси Евроиттифоқ рақамли яшил сертификатига боғлиқ бўлади.
Испанияга кириш учун сайёҳ Евроиттифоқда рухсат берилган вакциналарнинг иккита дозасини олгани тўғрисидаги маълумотномани ёки коронавирус билан касалланиб ўтгани ҳақидаги маълумотномани ёки бўлмаса, COVID-19’га нисбатан манфий тестни кўрсатиши керак.
Туркия Россиядан коронавирусга қарши «Спутник V» вакцинасини 50 миллион дозада сотиб олиш тўғрисидаги шартномани имзолади, дея маълум қилди мамлакат соғлиқни сақлаш вазири Фахриддин Кўжа. У шартнома қийматини ошкор қилмади.Кўжанинг маълум қилишича, ҳозир вакцина фавқулодда вазиятларда фойдаланишга рухсат олиш учун синовдан ўтказиш жараёнининг сўнгги босқичида турибди. «Спутник V»нинг илк партияларини май ойида олиб келиш кутилмоқда. 50 миллион доза вакцина Туркияга олти ой мобайнида етказилади.
Аввалроқ, 26 апрель куни Россия тўғридан-тўғри инвестициялар фонди Туркиянинг Viscoran Ilac фармацевтика компанияси билан «Спутник V»ни Туркияда ишлаб чиқариш ҳақида келишиб олган эди. Вакцинани ишлаб чиқариш бир нечта корхоналарда «яқин ойлар ичида» бошланиши мумкин.
Изоҳ (0)