Сурияда 51 киши президентлик сайловида қатнашиш учун номзодини қўйди

Сурияда 26 май куни бўлиб ўтадиган президентлик сайловида қатнашиш учун 51 нафар номзод ариза топширди. Бу ҳақда SANA давлат агентлигига таяниб, «РИА-Новости» хабар берди.

Аризалар Олий Конституциявий суд томонидан Сурия Халқ Кенгаши — парламентга топширилган.

«Халқ кенгаши раҳбари Олий Конституциявий суддан Хасан Рабия Рувайлининг президентликка номзоди бўйича аризаси қабул қилинганини эълон қилди. Бу президент сайловларида иштирок этиш учун қабул қилинган 51-ариза», — деб ёзади агентлик.

2014 йилги сайловларда 24 та ариза рўйхатдан ўтказилган, улардан уч номзод, шу жумладан, амалдаги президент Башар Асад сайловларда қатнашишга муваффақ бўлган эди.

Сурия конституциясига мувофиқ, парламент сайлов кампанияси бошлангани тўғрисида эълон қилинганидан кейин 10 кун ичида номзодларнинг аризаларини қабул қилади. Бу йилги сайлов кампанияси 19 апрелдан бошланди. Номзодларнинг 12 нафари сўнгги 24 соат ичида ариза топширди. Сурияда биринчи марта аёл киши президентлик сайловида номзод сифатида рўйхатдан ўтди. Шунингдек, Сурия президенти Башар Асад ҳам яқинлашаётган президентлик сайловларига ўз номзодини рўйхатдан ўтказиш учун сўров юборди. Амалдаги конституцияга кўра, Асад сўнгги марта сайловларда қатнашиш ҳуқуқига эга.

Аммо сайловларда камида 35 нафар депутатнинг овозини тўплай оладиган номзодларгина иштирок эта олади. Сурия Халқ Кенгаши 250 депутатдан иборат экани ҳисобга олинса, назарий жиҳатдан президентлик пойгасида етти кишидан кўп номзод иштирок эта олмайди.

Шу билан бирга, бош котиби Башар Асад бўлган «Баас» Араб Социалистик уйғониш партияси номзоди сайловларда иштирок этиш учун энг кўп имкониятга эга, чунки партия парламентда 167 ўринга эга.

Халқ Кенгашидаги қолган овозлар мустақил бўлиб, улар 70 нафар депутат ва «Миллий тараққиёт фронти» коалицияси таркибига кирувчи партиялар вакилларидан иборат, жами 13 нафар депутатга тегишли бўлади.

Башар Асад республика раҳбарлигини 2000 йилда, отаси — Суриянинг собиқ президенти Ҳофиз Асад вафот этганидан кейин эгаллаган. Фақат 2014 йилда биринчи марта Асаддан бошқа номзодлар ҳам президентлик сайловларида қатнашган. Ўшанда бошқалар қаторида Ҳасан ан-Нурий ва Махер Ҳажар президентлик учун курашган. Овоз бериш натижаларига кўра, Асад 88,7 фоиз натижа билан учинчи марта давлат раҳбари этиб сайланган.