AQShda bo‘lib o‘tgan otishma natijasida 5 kishi qurbon bo‘ldi

AQShning Shimoliy Karolina shtatidagi otishma natijasida eng kamida besh kishi halok bo‘ldi, deb xabar berdi Fox News telekanali.

Ta’kidlanishicha, qurbonlar orasida okrug nozirining ikki o‘rinbosari, ikki nafar fuqaro va o‘t ochishda gumonlanayotgan shaxs bor.

Qurollangan shaxs odatdagi tekshiruv uchun kelgan politsiya xodimlariga qarata o‘q uzganidan keyin, otishma yuzaga keldi va qarama-qarshilik 13 soatdan ortiq davom etdi. Atrofdagi mahalliy aholi evakuatsiya qilinib, ba’zilarga yashirinish buyurildi.

Voqea natijasida odamlar vafot etganidan keyin, otishma sodir bo‘lgan okrugning nozirlik idorasi oldidagi bayroqlari tushirildi. Mahalliy aholi qurbonlar xotirasi uchun voqea joyiga gullar va shamlar olib kelmoqda.

Avvalroq AQShning Shimoliy Karolina shtatidagi Elizabet-Siti shahrida afroamerikalikning politsiyachi tomonidan o‘ldirilgani sababli favqulodda holat e’lon qilindi.

Ma’lumot uchun, AQShning Ogayo shtati Kolumbus shahrida politsiya xodimi 16 yoshli qora tanli qizni otib o‘ldirdi. Bunga javoban politsiya binosi oldida namoyishchilar to‘planishni boshladi.

Qayd etilishicha, ushbu hodisa, taxminan, qora tanli amerikalik Jorj Floydni bo‘g‘ib o‘ldirgan sobiq politsiyachiga hukm e’lon qilingan vaqtda sodir bo‘lgan. Sud hay’ati Minneapolis shahrining sobiq politsiyachisi Derek Shovinni afroamerikalik Jorj Floydni ehtiyotsizlik orqasida odam o‘ldirishda aybdor deb topdi. Suddan keyin Shovin Minnesota shtatidagi Ouk-Park-Xayts axloq tuzatish muassasasiga joylashtirildi.

Shuningdek, AQShning Minnesota shtatidagi Bruklin-Senter shahrida yana bir qora tanli yigit politsiyachilar tomonidan hibsga olinish paytida o‘ldirildi. Shundan so‘ng shaharda norozilik namoyishlari boshlangan. Shuningdek, AQShda politsiyachi shifoxonaga yotqizilgan qora tanli erkakni otib qo‘ygan edi.

Eslatib o‘tamiz, Bundan avval 2020-yilning may oyida Minnesota shtatida qora tanli amerikalik Jorj Floyd politsiya tomonidan hibsga olinayotganda politsiyachi uni yerga yotqizib, tizzasi bilan uzoq vaqt bo‘ynini bosib turishi oqibatida o‘lgandi. Buning ortidan mamlakat bo‘ylab huquq-tartibot organlari shafqatsizligi va irqiy tengsizlikka qarshi ommaviy norozilik namoyishlari avj oldi va Black Lives Matter (“Qora tanlilarning hayoti muhim”) harakati paydo bo‘ldi. AQShda ushbu noroziliklar fonida tartibsizliklar boshlangan, politsiya va namoyishchilar o‘rtasida to‘qnashuv ham bo‘lgandi.