Ўзбекистонда COVID-19 билан касалланиш ҳолати ортаётгани, Жисмоний тарбия ва спорт университети талабалари орасида ҳам бундай ҳолатлар аниқлангани сабабли ушбу университетда ўқув жараёни 21 апрелдан 14 кунга масофавий шаклга ўтказилди.
Университет матбуот хизмати эпидемиологик вазият барқарорлашгач, анъанавий ўқув жараёнига қайтиш борасида қўшимча хабар берилишини маълум қилган.
Шунингдек, Ўзбекистон давлат жаҳон тиллари университети ҳамда унинг академик лицейи ҳам масофавий таълимга ўтказилди. Университет матбуот хизмати хабарига кўра, коронавирус инфекцияси тарқалишининг олдини олиш мақсадида кўрилаётган чоралар доирасида ўқув жараёнлари 20 апрелдан бошлаб 14 кун давомида онлайн тарзда давом этади.
Эслатиб ўтамиз, бундан аввал ЎзДЖТУнинг фақат 1-босқич кечки бўлим талабалари 20 апрелдан 14 кун онлайн таълимга ўтказилганди.
Аввалроқ Жаҳон иқтисодиёти ва дипломатия университетида 19 апрелдан бошлаб, Самарқанд иқтисодиёт ва сервис институтида 20 апрелдан бошлаб ўқиш коронавирус сабаб 14 кунга масофавий шаклга ўтказилгани ҳақида хабар берилган эди.
Шунингдек, Алишер Навоий номидаги Тошкент давлат ўзбек тили ва адабиёти университетида профессор-ўқитувчилари, талабалари орасида коронавирусга чалиниш ҳолати аниқлангани сабаб дарслар 19 апрелдан масофавий шаклга ўтказилгани ҳақида хабар берилган эди. Ўзбекистон журналистика ва оммавий коммуникациялар университетида ҳам дарслар 12 апрелдан бошлаб икки ҳафтага онлайн шаклга ўтказилди.
Бундан ташқари, Ўзбекистон давлат консерваториясининг 4 нафар ўқитувчи ва 1 нафар талабасида коронавирус аниқланиб, ОТМ масофавий таълимга ўтганди. 25 март куни Тошкент молия институти ва Тошкент транспорт университети талабаларида ҳам коронавирус аниқлангани сабаб факультет талабалари масофавий таълимга ўтказилганди.
Изоҳ (0)