O‘zbekistonda COVID-19 bilan kasallanish holati ortayotgani, Jismoniy tarbiya va sport universiteti talabalari orasida ham bunday holatlar aniqlangani sababli ushbu universitetda o‘quv jarayoni 21-apreldan 14 kunga masofaviy shaklga o‘tkazildi.
Universitet matbuot xizmati epidemiologik vaziyat barqarorlashgach, an’anaviy o‘quv jarayoniga qaytish borasida qo‘shimcha xabar berilishini ma’lum qilgan.
Shuningdek, O‘zbekiston davlat jahon tillari universiteti hamda uning akademik litseyi ham masofaviy ta’limga o‘tkazildi. Universitet matbuot xizmati xabariga ko‘ra, koronavirus infeksiyasi tarqalishining oldini olish maqsadida ko‘rilayotgan choralar doirasida o‘quv jarayonlari 20-apreldan boshlab 14 kun davomida onlayn tarzda davom etadi.
Eslatib o‘tamiz, bundan avval O‘zDJTUning faqat 1-bosqich kechki bo‘lim talabalari 20-apreldan 14 kun onlayn ta‘limga o‘tkazilgandi.
Avvalroq Jahon iqtisodiyoti va diplomatiya universitetida 19-apreldan boshlab, Samarqand iqtisodiyot va servis institutida 20-apreldan boshlab o‘qish koronavirus sabab 14 kunga masofaviy shaklga o‘tkazilgani haqida xabar berilgan edi.
Shuningdek, Alisher Navoiy nomidagi Toshkent davlat o‘zbek tili va adabiyoti universitetida professor-o‘qituvchilari, talabalari orasida koronavirusga chalinish holati aniqlangani sabab darslar 19-apreldan masofaviy shaklga o‘tkazilgani haqida xabar berilgan edi. O‘zbekiston jurnalistika va ommaviy kommunikatsiyalar universitetida ham darslar 12-apreldan boshlab ikki haftaga onlayn shaklga o‘tkazildi.
Bundan tashqari, O‘zbekiston davlat konservatoriyasining 4 nafar o‘qituvchi va 1 nafar talabasida koronavirus aniqlanib, OTM masofaviy ta’limga o‘tgandi. 25-mart kuni Toshkent moliya instituti va Toshkent transport universiteti talabalarida ham koronavirus aniqlangani sabab fakultet talabalari masofaviy ta’limga o‘tkazilgandi.
Izoh (0)