Қашқадарёнинг Яккабоғ туманида хотини, қайнанаси ва икки нафар вояга етмаган болани пичоқлаб ўлдирган эркакка суд ҳукми ўқилди. Бу ҳақда вилоят Ички ишлар бошқармаси ахборот хизмати хабар берди.
Маълум қилинишича, 2020 йилнинг 10 декабрга ўтар кечаси 30 ёшли эркак Яккабоғ туманининг «Эски Яккабоғ» маҳалласидаги қайнанасининг уйига 2 та ошхона пичоғи билан келган. Уйга девор орқали ошиб кирган эркак аввал ҳомиладор хотинини, сўнг унинг онасини пичоқлаган.
Жиноятчи қайнананинг бақирганидан уйғонган 8 ёшли Р.Ш. ва 6 ёшли А.Ш.га ҳам пичоқ санчган. Шундан сўнг фуқаро воқеа жойидан яширинган.
Жиноят ишлари бўйича Қашқадарё вилояти судида бўлиб ўтган сўнгги суд йиғилишида ҳукм ўқилди. Унга кўра, эркак Жиноят кодексининг 97-моддасининг (қасддан одам ўлдириш) қатор бандлари ва 219-моддасининг (ҳокимият вакилига ёки фуқаровий бурчини бажараётган шахсга қаршилик кўрсатиш) 1-қисми билан айбдор деб топилиб, узил-кесил умрбод озодликдан маҳрум қилиш жазоси тайинланди. Жазони махсус тартибли колонияларда ўташ белгиланган.
Аввалроқ Қашқадарёда маст эркак хотини ва қайнсинглисини пичоқлагани, Яккабоғ туманидаги зовурдан одам жасади топилгани, Самарқандда хотини ва унинг жазманини пичоқлаб ўлдирган эркак қўлга олингани тўғрисида хабар берилганди.
Изоҳ (0)