Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов оммавий ахборот воситалари соҳасида фаолият юритадиган тадбиркорларга амалдорлар томонидан бўлаётган босимга қарши фикр билдирди. Унинг баёноти «Чегара билмас мухбирлар» ташкилотининг матбуот эркинлиги бўйича навбатдаги рейтинги чиққан кунда эълон қилинди (рейтингда 2018 йилдан буён биринчи марта Ўзбекистоннинг кўрсаткичлари ёмонлашган).
«Баъзида давлат идораси ходимлари хусусий тадбиркорлар, яни оммавий ахборот воситаси фаолияти билан шуғулланувчи масъулияти чекланган жамиятга қўнғироқ қилиб, улар қонун доирасида яратаётган маҳсулотларини (мақолани) ўчириб ташлашни талаб қилишади. Агарда хусусий тадбиркор бўлмиш сайт буни бажармаса уни чақиришади, қўрқитишади. Аслида бу ноқонуний ҳаракат, мансаб ваколатини суиистемол қилиш ҳисобланади. Соддароқ айтганда, тадбиркорнинг фаолиятига асоссиз аралашишдир», — деб ёзади Комил Алламжонов.
«Бу худдики супермаркет эгасига қўнғироқ қилиб, шу маҳсулотни савдо пештахтасидан олиб ташла дегандек талаб. Ёки шоколад заводига телефон қилиб, эртадан бошлаб мармеладли шоколадни бошқа ишлаб чиқарманглар дейиш билан тенг», — дея таъкидлайди у.
Шу куннинг ўзида олдинроқ масс-медиани қўллаб қувватлаш фонди васийлик кенгаши раиси Ўзбекистоннинг матбуот эркинлиги бўйича рейтинги ёмонлашгани учун соҳадаги барча масъул «мутасаддиларга машаққатли, сермазмун, ижодий ва тинимсиз меҳнатлари учун катта ‘раҳмат’ » айтди.
«Барака топинглар, ҳурматлилар. Рейтинг-пейтингга бало борми, ‘тоже мне’. Тушди нима, кўтарилди нима, тўғрими? Ота-бобонг қилган ишни қилсанглар бўлмайдими, дейдиган одам йўқ. Чойхоналаримиздан, гап, улфатчиликларимиздан қўймасин. Зато бизда Бунёдкор стадиони бор. Файзимизни берсин», — деб ёзади у.
ЎзЛиДеП аъзоси, депутат Расул Кушербаев ўзининг Telegram’даги каналида ОАВга босимлар тўғрисидаги хабарга муносабат билдирганди.
«Биз либерал ғоялар тарафдори сифатида ОАВ ва сўз эркинлигини бўғиш, жамиятни ривожланишдан тўхтатишга қаратилган ҳар қандай ҳаракатни кескин қоралаймиз», — дея таъкидлайди у.
Изоҳ (0)