Самарқанд иқтисодиёт ва сервис институтида дарслар 20 апрелдан бошлаб 14 кунга масофавий шаклга ўтказилди. Бу ҳақда институт матбуот хизмати маълум қилди.

Фото: СамИСИ матбуот хизмати

Қайд этилишича, Республика ҳудудида COVID-19 билан касалланиш ҳолат ортаётгани, институт талабалари орасида ҳам бундай ҳолатлар аниқлангани сабабли Олий ва ўрта махсус таълим вазирлиги билан келишилган ҳолда шундай қарорга келинган.

«Эпидемиологик вазият барқарорлашгач, анъанавий ўқув жараёнига қайтиш борасида қўшимча хабар берилади», — дейилади хабарда.

Бундан аввал Алишер Навоий номидаги Тошкент давлат ўзбек тили ва адабиёти университетида профессор-ўқитувчилари, талабалари орасида коронавирусга чалиниш ҳолати аниқлангани сабаб дарслар 19 апрелдан масофавий шаклга ўтказилгани ҳақида хабар берилган эди. Ўзбекистон журналистика ва оммавий коммуникациялар университетида ҳам дарслар 12 апрелдан бошлаб икки ҳафтага онлайн шаклга ўтказилди.

Аввалроқ Ўзбекистон давлат консерваториясининг 4 нафар ўқитувчи ва 1 нафар талабасида коронавирус аниқланиб, ОТМ масофавий таълимга ўтганди. Шунингдек, 25 март куни Тошкент молия институти ва Тошкент транспорт университети талабаларида ҳам коронавирус аниқлангани сабаб факультет талабалари масофавий таълимга ўтказилганди.

Ўзбекистон давлат консерваториясида ва Тошкент молия институтида ҳам дарслар 26 мартдан 8 апрелга қадар (14 кун) масофавий шаклга ўтказилганди. Ўзбекистон халқаро Ислом академиясида 14 кунлик карантин эълон қилиниб, ўқув жараёни 26 мартдан 6 апрелга қадар масофавий тарзда амалга оширилди.

Бундан ташқари, Тошкент транспорт университети талабасида ҳам коронавирус аниқлангани сабаб факультет талабалари масофавий таълимга ўтказилган, Тошкентдаги Инҳа университети талабасида коронавирус аниқлангани сабаб ушбу ОТМ 23 мартдан бошлаб икки ҳафта карантинга ёпилганди.