Ижтимоий тармоқларда Термиз шаҳридаги ресторанларнинг бирида бир гуруҳ шахслар мушталашаётгани акс этган видео тарқалди. Сурхондарё вилояти ИИБ матбуот хизмати ҳолат юзасидан расмий маълумот берди.
Маълум қилинишича, воқеа 16 апрель куни тахминан соат 19:10 ларда Термиздаги «Хан Султан» ресторанида юз берган. Н.Н. оила аъзолари билан ушбу ресторанга овқатланиш учун келган. Бироз вақт ўтиб улар ўтирган столга дўсти М.Б. ҳам келиб ўтирган ва Н.Н. яна қўшимча буюртма берган. Аммо буюртма кечиккани сабаб официант билан ўртасида тортишув келиб чиққан.
Ресторан иш бошқарувчиси З.Т. мижоз Н.Н.га жанжал қилмасликни, Рамазон ойида ўзаро ҳурматда бўлишни сўраган. Бунга жавобан Н.Н. унга бақириб, ўзаро ҳурматда бўлмаслигини айтганидан сўнг Н.Н. ва ресторан ишчилари ўртасида жанжал келиб чиққан.
Жанжал вақтида Н.Н. қўли билан З.Т.нинг юзига бир марта урган. Шундан сўнг Н.Н.нинг қайнукаси А.Т. ҳам жанжалга аралашиб, З.Т.нинг юзига қўли билан икки марта уриб тан жароҳати етказган. А.Т.ни тинчлантирмоқчи бўлган ресторан ишчилари Ф.Ж. ва Н.А. ҳам тан жароҳати олган.
Жанжал вақтида ресторан эшигининг ойнаси ва идиш жамланмалари уриб синдирилган.
ИИВ Тергов департаментининг маълум қилишича, ҳолат юзасидан Термиз шаҳри бўйича ИИО ФМБ ҳузуридаги Тергов бўлими томонидан 36 ёшли Н.Н. ва 31 ёшли Т.А.га нисбатан Жиноят кодексининг 277-моддаси (безорилик) билан жиноят иши қўзғатилиб, процессуал тартибда ушланган.Тергов ҳаракатлари давомида улар муқаддам безорилик жиноятлари учун судлангани аниқланган.
Сурхондарё вилояти ИИБ матбуот хизмати жиноят иши тергов ҳаракатлари давомида ресторан ишчилари ва бошқа иштирокчиларнинг ҳаракатларига ҳам қонуний баҳо берилишини билдирган.
Изоҳ (0)