Прогнозлаш ва макроиқтисодий тадқиқотлар институти Price Warnings лойиҳаси доирасида Тошкент бозорларидаги озиқ-овқат маҳсулотлари нархларини ўрганиб, бошқа мамлакатлар пойтахтларидаги нархлар билан солиштирди, дея хабар бермоқда «Gazeta.uz».
Таъкидланишича, тадқиқот давомида Тошкент савдо нуқталаридаги маҳсулотларнинг энг минимал нархлари олинган. Маълум бўлишича, февраль ойидан буён 28 хил маҳсулотдан 20 тасининг нархларида ўзгаришлар кузатилган, 17 хил маҳсулот нархлари қимматлаган.
Тошкентдаги нархлар билан бир қаторда, 16 та МДҲ ва Европа давлатлари пойтахтларидаги нархлар ҳам ўрганилган ва солиштирилган.
Солиштирув натижаларига кўра, Тошкентдаги айрим маҳсулотларнинг нархлари бироз хавотирли кўринмоқда.
Апельсинлар
Тошкент супермаркетларида апельсинларнинг минимал нархи 1 килограмм учун 2,8 долларга тенг. Бу таҳлил қилинаётган шаҳарлар, жумладан Москвадаги апельсинларнинг минимал нархидан 4,3 бараварга юқори. Ушбу кўрсаткич бўйича Тошкент шаҳри Рим, Лондон, Берлин шаҳарларини ҳам ортда қолдирган.
Лимон
Тошкентдаги супермаркетларда 1 килограмм лимоннинг минимал нархи 2,8 долларни ташкил этади, бу таҳлил қилинаётган мамлакатлар учун ўртача кўрсаткичдан 69,4 фоизга, шу жумладан, Анқарадаги лимонларнинг минимал нархидан 3,3 баравар юқори. Бу ерда ҳам нархлар Европа мегаполисларидаги нархлардан анча баланд.
Банан
Тошкентдаги супермаркетларда 1 килограмм бананнинг минимал нархи 2,1 долларни ташкил этади, бу таҳлил қилинаётган мамлакатлар учун ўртача нархдан 55,7 фоизга юқори ва Москвадаги банан учун қайд этилган минимал нархдан 2,7 баравар юқори. Банан нархлари бўйича ҳам Тошкент МДҲ пойтахтларини ҳамда бир қатор Европа марказларини ортда қолдирган.
Қадоқланган сут
Тошкент шаҳридаги супермаркетларда пастеризация қилинган сутнинг минимал нархи 1 литр учун 0,82 долларни ташкил этади, бу таҳлил қилинаётган мамлакатлар учун ўртача 18,8 фоизга ва Бишкекдаги энг минимал нархдан 93 фоизга юқори. Қадоқланган сутнинг юқори нархларининг асосий сабаби бозордаги ривожланмаган рақобатдир, дейилади институт таҳлилида.
Маргарин
Тошкент шаҳридаги супермаркетларда 1 килограмм маргариннинг минимал нархи 2,2 долларни ташкил этади, бу таҳлил қилинаётган мамлакатлар учун ўртача нархдан 20,2 фоизга ва Бишкекдаги энг минимал қайд этилган нархдан 85,6 фоизга юқори.
Картошка
Тошкент шаҳридаги супермаркетларда картошканинг минимал нархи 1 килограмм учун 0,46 долларни ташкил этади, бу Анқарадаги картошка учун белгиланган минимал нархдан 2,3 баравар юқори.
Мандаринлар
Тошкентдаги супермаркетларда 1 килограмм мандариннинг минимал нархи 1,7 долларни ташкил этади, бу Москвадаги мандаринлар учун белгиланган энг паст нархдан 87,9 фоизга юқори.
Ўсимлик ёғи
Тошкент шаҳридаги супермаркетларда ўсимлик (кунгабоқар) ёғининг минимал нархи литри учун 1,7 долларни ташкил этади, бу таҳлил қилинаётган мамлакатлар учун ўртача нархдан 6,7 фоизга юқори ва Бишкек шаҳридаги кунгабоқар ёғи учун белгиланган минимал нархдан 2 баравар юқори.
Макарон
Тошкент шаҳридаги супермаркетларда макарон маҳсулотларининг минимал нархи 1 килограмм учун 0,83 долларни ташкил этади, бу Минскдаги макарон маҳсулотлари учун белгиланган минимал нархдан 83,4 фоизга юқори.
Мол гўшти
Тошкент шаҳридаги супермаркетларда 1 килограмм мол гўштининг минимал нархи 5,2 долларни ташкил этади, бу Минскдаги мол гўшти учун белгиланган энг паст нархдан 56,5 фоизга юқори.
Бундан аввал Ўзбекистонда энг қиммат ва энг арзон ўсимлик ёғи қаерда сотилаётгани маълум қилингани, Ўзбекистонда инфляция даражаси кетма-кет уч ойдан буён 1 фоиздан ошмаётгани ҳамда Ўзбекистон аҳолисининг даромади 2020 йилда кескин камайгани ҳақида хабар берилганди.
Изоҳ (0)