Тошкент шаҳар ҳокимлиги ташаббуси билан ташкил этилаётган «Тошкент Беш ташаббус ҳаракати» тадбирларига рўйхатга олиш жараёни 26 март куни бошланган эди. Фестиваль ташкилотчиларининг «Дарё»га маълум қилишича, асосий тадбирлар 21 майдан 25 майга қадар бўлиб ўтади.
Ҳозиргача 10 300 га яқин киши «Тошкент Беш ташаббус ҳаракати» тадбирларида иштирок этиш учун рўйхатдан ўтди — 16 ёшдан 30 ёшгача бўлган 7 200 нафар йигит-қиз меҳмон сифатида қатнашиш истагини билдирган бўлса, ҳафталик доирасидаги тадбирларда иштирокчи сифатида рўйхатдан ўтганлар сони салкам 3 мингга етди.
«Тошкент Беш ташаббус ҳаракати»да иштирокчи сифатида рўйхатдан ўтган минглаб ёшлар маданият, санъат, спорт, ахборот технологиялари, мутолаа ва тадбиркорлик йўналишлари бўйича мусобақаларда совринли ўринлар учун курашади.
Масалан, биргина футбол турнирида қатнашиш учун ўртача олти-етти кишидан иборат 155 жамоа рўйхатдан ўтган — бу 1000 га яқин ёш футболчи дегани! Баскетбол турнирида қатнашувчилар сони ҳам 100 нафардан ошган.
«Х лойиҳаси» ғоялар танловида ҳозирча 45 киши ўз АйТи-қобилиятларини намоён этиш истагини билдирган. Жамоалардан Тошкентни ривожлантиришга оид лойиҳаларни тақдим этиш талаб этилган Аёллар нетворкинги ҳафталигида камида 50 нафар қиз қатнашмоқчи.
Тадбир доирасидаги танловлар орасида ёшлар эътиборини энг кўп «Заковат» интеллектуал баҳси ўзига тортмоқда — ҳозирча унда 1860 киши ўз билимларини намоён этишга бел боғлаган. Бироқ бу ҳали якуний рақамлар эмас — рўйхатга олиш ҳали тугагани йўқ.
Изоҳ (0)