Қашқадарё вилояти ҳокими Зоир Мирзаев «Дарё» мухбири ва ИИБ мансабдори ўртасида юзага келган ҳолатга муносабат билдириб, вазият шахсан назоратида эканлигини билдирди. Бу ҳақда ҳоким билан телефон орқали мулоқот қилган «Дарё» мухбири хабар берди.
Таъкидланишича, Зоир Мирзаев «Дарё» мухбири Отабек Қўлдошев билан телефон орқали мулоқот қилган.
«Хизмат фаолияти давомида ИИБ ходимларининг чегарадан чиқиш ҳолати учраб туради. Қашқадарёда эса бундай вазият икки карра кўпроқ. Бу воқеадан хабар топганимдан кейин вилоят ИИБ бошлиғи билан ҳам боғландим. Ва айбдорга нисбатан қонуний чора кўрилиши лозимлигини айтдим. Бу иш шахсан назоратимда, айбдорга, албатта, қонуний чора кўрилади», — деган вилоят ҳокими сайт мухбири билан мулоқотида.
Эслатиб ўтамиз, 2021 йилнинг 16 апрель куни Рамазон ойининг илк жумасидан фоторепортаж тайёрлашга киришган «Дарё» мухбири Қарши шаҳридаги Кўк гумбаз жоме масжидида ўзини Азамат Шаймардонов дея таништирган ИИБ мансабдори қаршилигига учраган. ИИБ масъули «Дарё» мухбирининг профессионал фаолиятига тўсқинлик қилгани етмагандек, унинг иш қуролини ҳам зўрлик билан тортиб олган. Ва қўл остидаги ходимларга журналистни олиб бориб тиқишни буюрган. Топшириқни олган ИИБ ходимлари эса журналистни жиноятда гумонланувчиларни ташувчи махсус автомобилда ярим соат «сайр қилдириб», ахири Қарши шаҳар ИИБ 1-сонли ички ишлар бўлимига олиб борган.
Ушбу воқеадан сўнг «Дарё» таҳририяти зудлик билан ИИВ матбуот котиби Шоҳрух Ғиёсов билан боғланди. Шунингдек, Қарши шаҳар 1-сонли ИИБ биноси олдига қашқадарёлик бир гуруҳ журналист ва блогерлар тўпланган. Кўп ўтмай 1-сонли ИИБга Қарши шаҳар ИИБ бошлиғи Б.Мирзаев ва вилоят ИИБ ахборот хизмати раҳбари Ирода Расулова ҳам етиб келган.Юзага келган вазият юзасидан Ички ишлар вазирлиги матбуот хизмати баёнот бериб, «Қарши шаҳрида ‘Дарё’ интернет-нашри мухбири Отабек Қўлдошев билан суҳбат жараёнида касб этикасини бузган ички ишлар органи ходимининг ҳаракатлари ўрганиб чиқилиб, ҳуқуқий баҳо берилади», деди.
Мазкур воқеага муносабат билдирган АОКА эса «Бу каби ҳолатлар давлат сиёсатига зид» эканлигини эслатиб, Агентлик ўз ваколати доирасида Ички ишлар вазирлигига сўров юборганини ҳамда Ички ишлар вазирлиги амалдаги қонунчилик нормаларини четлаб ўтган ходимнинг хатти-ҳаракатларига муносиб баҳо беришидан умидворлигини билдирди.
Мавзуга доир:
- ИИВ Андижонда ИИБ ходимлари қийноқларидан вафот этган фуқаро иши юзасидан узр сўради
- «Андижондаги воқеа ҳуқуқни муҳофаза қилиш органлари тизимини тубдан ислоҳ қилиш лозимлигини кўрсатди». «Юксалиш» умуммиллий ҳаракати ҳодисага муносабат билдирди
- «‘Участкавойъларингни қутқариб қолсаларинг, ургани йўқ десаларинг, рози қилади». Чироқчилик ИИБ ходимлари қотилликни яшириш учун гувоҳларнинг оғзини ёпишга уринган
- ИИВ матбуот котиби: ИИБ биносида одам ўлими — янгилик эмас
Изоҳ (0)