Жаҳон соғлиқни сақлаш ташкилоти (ЖССТ) раҳбари Тедрос Гебрейесус дунёда коронавирус билан касалланиш ҳолатларнинг кўпайгани кетма-кет еттинчи ҳафта кузатилганини маълум қилди, деб ёзмоқда «РБК».
«Биз ҳозир коронавирус билан касалланишнинг кетма-кет етти ҳафтадан буён, ўлим ҳолатларининг эса тўрт ҳафтадан буён ортаётганини кузатяпмиз», — деб таъкидлади Гебрейесус.
У вакцинациянинг коронавирусга қарши курашда ягона йўл эмаслигини айтиб, одамларни ижтимоий масофага риоя қилишга, тиббий ниқоб тақишга, ўзини яккалашга ва бошқа чораларни қўллашга чақирди.
ЖССТ маълумотларига кўра, COVID-19 билан касалланиш ҳолатларининг кескин кўпайиши февраль ойининг ўрталарида содир бўлган. 16 февралда кунлик пасайиш 33,4 фоизни ташкил этган бўлса, 17 февраль куни 58,75 фоиз ўсиш кузатилган.
Ундан олдин, январь ойи бошидан буён дунёда коронавирус билан касалланганлар сонининг камайиши кузатилаётган эди. 15 февралдан олдин, ҳафталик пасайиш 9,77 фоизни ташкил этган бўлса, ундан кейинги ҳафтада эса 7,81 фоиз ўсиш қайд этилди. Ўшандан буён касалликнинг пасайиши кузатилмади, 5 апрель ҳолатига кўра, ҳафталик ўсиш 8,83 фоизни ташкил этди. Умумий ҳисобда бу кўрсаткич ҳафтасига 362 068 та ҳолатга тенг бўлади.
15 мартдан олдинги ҳафтадан ўлим ҳолатларининг ўсиши (3,14 фоиз) қайд этила бошлади. Бунгача олти ҳафта давомида пасайиши кузатилаётган эди. 5 апрель ҳолатига кўра, ўлим ҳолатларининг ўсиши 5,37 фоизни ташкил қилди.
Пандемия бошидан буён дунё бўйича жами 135,6 миллион киши коронавирус билан касалланди, уларнинг 2,9 миллиондан кўпроғи вирус қурбонига айланди. Март ойида Буюк Британия, Германия, Франция, Италия ва бошқа бир қатор давлатларда карантин чекловлари кучайтирилди.
Маълумот учун, олимлар COVID-19 вакцинаси инфекциядан ва вируснинг қайта юқишидан ҳимоя қилади, дея ҳали ишонч билан айта олгани йўқ. Шу сабабли ЖССТ «вакцина паспортлари» жорий этилиши пандемияга қарши курашда «самарасиз стратегия» бўлиб чиқиши мумкин, деб ҳисоблайди. Бундан ташқари, мутахассислар бундай паспортлар дискриминацияга сабаб бўлиши мумкинлигидан огоҳлантирмоқда.
Аввалроқ АҚШда коронавируснинг атом тузилишини ўрганаётган олимлар вируснинг асосий ферментларидан бирини рентгенограмма қилди. Британия Колумбияси университетидан (УБC) олимлар жамоаси кристалланган шаклдаги SARS-CoV-2 оқсилларини ўрганиш учун мукаммал рентген нурлари ёрдамида биринчи марта вируснинг асосий протеазини — вируснинг кўпайиши ва бошқа инсон ҳужайраларига юқиши учун керак бўлган катта оқсиллар кесишишига имкон берувчи ферментини кузатди.
Шунингдек, ЖССТ коронавирусга қарши AstraZeneca вакцинасининг самарадорлиги унинг зарарли томонларидан устун деб ҳисобламоқда.
Изоҳ (0)