Jahon sog‘liqni saqlash tashkiloti (JSST) rahbari Tedros Gebreyesus dunyoda koronavirus bilan kasallanish holatlarning ko‘paygani ketma-ket yettinchi hafta kuzatilganini ma’lum qildi, deb yozmoqda “RBK”.
“Biz hozir koronavirus bilan kasallanishning ketma-ket yetti haftadan buyon, o‘lim holatlarining esa to‘rt haftadan buyon ortayotganini kuzatyapmiz”, — deb ta’kidladi Gebreyesus.
U vaksinatsiyaning koronavirusga qarshi kurashda yagona yo‘l emasligini aytib, odamlarni ijtimoiy masofaga rioya qilishga, tibbiy niqob taqishga, o‘zini yakkalashga va boshqa choralarni qo‘llashga chaqirdi.
JSST ma’lumotlariga ko‘ra, COVID-19 bilan kasallanish holatlarining keskin ko‘payishi fevral oyining o‘rtalarida sodir bo‘lgan. 16-fevralda kunlik pasayish 33,4 foizni tashkil etgan bo‘lsa, 17-fevral kuni 58,75 foiz o‘sish kuzatilgan.
Undan oldin, yanvar oyi boshidan buyon dunyoda koronavirus bilan kasallanganlar sonining kamayishi kuzatilayotgan edi. 15-fevraldan oldin, haftalik pasayish 9,77 foizni tashkil etgan bo‘lsa, undan keyingi haftada esa 7,81 foiz o‘sish qayd etildi. O‘shandan buyon kasallikning pasayishi kuzatilmadi, 5 aprel holatiga ko‘ra, haftalik o‘sish 8,83 foizni tashkil etdi. Umumiy hisobda bu ko‘rsatkich haftasiga 362 068 ta holatga teng bo‘ladi.
15-martdan oldingi haftadan o‘lim holatlarining o‘sishi (3,14 foiz) qayd etila boshladi. Bungacha olti hafta davomida pasayishi kuzatilayotgan edi. 5-aprel holatiga ko‘ra, o‘lim holatlarining o‘sishi 5,37 foizni tashkil qildi.
Pandemiya boshidan buyon dunyo bo‘yicha jami 135,6 million kishi koronavirus bilan kasallandi, ularning 2,9 milliondan ko‘prog‘i virus qurboniga aylandi. Mart oyida Buyuk Britaniya, Germaniya, Fransiya, Italiya va boshqa bir qator davlatlarda karantin cheklovlari kuchaytirildi.
Ma’lumot uchun, olimlar COVID-19 vaksinasi infeksiyadan va virusning qayta yuqishidan himoya qiladi, deya hali ishonch bilan ayta olgani yo‘q. Shu sababli JSST “vaksina pasportlari” joriy etilishi pandemiyaga qarshi kurashda “samarasiz strategiya” bo‘lib chiqishi mumkin, deb hisoblaydi. Bundan tashqari, mutaxassislar bunday pasportlar diskriminatsiyaga sabab bo‘lishi mumkinligidan ogohlantirmoqda.
Avvalroq AQShda koronavirusning atom tuzilishini o‘rganayotgan olimlar virusning asosiy fermentlaridan birini rentgenogramma qildi. Britaniya Kolumbiyasi universitetidan (UBC) olimlar jamoasi kristallangan shakldagi SARS-CoV-2 oqsillarini o‘rganish uchun mukammal rentgen nurlari yordamida birinchi marta virusning asosiy proteazini — virusning ko‘payishi va boshqa inson hujayralariga yuqishi uchun kerak bo‘lgan katta oqsillar kesishishiga imkon beruvchi fermentini kuzatdi.
Shuningdek, JSST koronavirusga qarshi AstraZeneca vaksinasining samaradorligi uning zararli tomonlaridan ustun deb hisoblamoqda.
Mavzuga doir:
Izoh (0)