Fransiya prezidenti Emanuel Makron mamlakatning barcha hududlarida to‘rt haftalik karantin joriy qildi. Bu haqda Makronning aholiga qilgan murojaatnomasiga tayanib, France24 telekanali xabar berdi, deb yozmoqda “RBK”.

Koronavirus bilan kasallanish holatlarining keskin ko‘paygani karantinning qayta joriy etilishiga asosiy sabab bo‘ldi. Jahon sog‘liqni saqlash tashkilot (JSST) ma’lumotlariga ko‘ra, Fransiyada 20-yanvarda 23 347 kishida, 20-fevralda 23 170 kishida koronavirus aniqlangan, mart oyining o‘rtalaridan boshlab bu ko‘rsatkich o‘sa boshlagan: 12-martda 27 166 kishida, 17-mart kuni 29 145 kishida, 26-mart kuni 45 401 kishida koronavirus qayd etilgan. 1-aprel kuni esa bu ko‘rsatkich 58 828 nafarga yetdi.

“Virus nafaqat yuqumli, balki o‘ta xavfli ham”, — dedi davlat rahbari va “hozir jonlantirish bo‘limidagi bemorlarning 44 foizi 65 yoshdan kichik” ekanini ta’kidladi.

Fransiyada karantin sababli joriy qilingan chora-tadbirlar:

• mamlakatning barcha hududida soat 19:00 dan komendantlik soati yo‘lga qo‘yildi;
• xodimlarning imkon boricha masofaviy ish tartibiga o‘tishi belgilandi;
• bolalar bog‘chasi, maktab va kollejlarning faoliyati uch haftaga to‘xtatildi, talabalar haftada bir marta universitetga borishi mumkin;
• birlamchi ehtiyoj mahsulotlarini sotmaydigan do‘konlar yopildi, kitob va musiqa do‘konlari, shuningdek, xo‘jalik mahsulotlari do‘konlari bundan mustasno. Sartaroshxonalar ham faoliyatini davom ettiradi;
• izolyatsiya hududidan jiddiy sabablarsiz 10 kilometrdan ortiq masofaga chiqish taqiqlanadi; fransiyaliklar bir hududdan boshqa hududga faqat Pasxa bayramida borishi mumkin.

Shuningdek, Makron o‘zining Twitter sahifasida tez orada jonlantirish bo‘limlarida o‘rinlar soni 10 mingtagacha oshirilishi, bu esa tibbiyot muassasalarida og‘ir kasallar ko‘payishining oldini olishi haqida yozdi.

Avvalroq Fransiyaning 19 ta hududida karantin choralari joriy qilingan edi. Ular orasida poytaxt hududida joylashgan Il-de-Frans, Lion va mamlakatning boshqa mintaqalaridagi shaharlar ham bor edi. Davlat tarkibiga jami 101 ta hudud kiradi, ulardan beshtasi Fransiyaning asosiy hududidan uzoqda, dengiz bo‘yida joylashgan. Mamlakat bo‘ylab 19:00 dan 06:00 gacha komendantlik soati joriy qilingan, shuningdek, barlar, restoranlar, muzeylar, kinoteatrlar va odamlar yig‘iladigan boshqa joylar faoliyati to‘xtatilgan.

Jons Hopkins universitetining ma’lumotlariga ko‘ra, bugungi kunda Fransiya koronavirus bilan kasallanganlar soni bo‘yicha dunyoda to‘rtinchi o‘rinda turibdi. Pandemiya boshidan buyon 4,7 million aholida koronavirus aniqlandi, 95 mingdan ortiq bemor vafot etdi. 1-aprel kuni mamlakatda 58 828 kishida koronavirus aniqlandi, 299 kishi vafot etdi.

Avvalroq Fransiya prezidenti Rossiya va Xitoyning COVID-19’ga qarshi vaksinalar yetkazib berish sohasidagi harakatlari tufayli Yevropa yangi turdagi jahon urushiga duch kelganini aytgan edi. Uning fikriga ko‘ra, Yevropa mamlakatlari vaksinalar masalasida boshqalarga qaram bo‘lmaslik uchun zarur choralarni ko‘rishi kerak.

Shuningdek, Fransiya prezidenti Emmanuel Makron aholini koronavirusga qarshi emlash imkoniyatlarini maksimal darajada oshirishga chaqirdi. Emlash markaziga tashrifi davomida Makron vaksinatsiya “maksimal” bo‘lishi va haftaning yetti kunida “ertalab, tushdan keyin va kechqurun” o‘tkazilishi kerakligini aytdi.

Parij shahrining chekkasida joylashgan mamlakatdagi eng yirik Stade de France sport arenasida esa koronavirusga qarshi emlash jarayoni olib boriladigan katta ko‘lamli vaksinatsiya markazi tashkil etilishi ma’lum qilindi.

U yerda vaksinatsiya karantin tufayli yopilgan stadionga jamoatchilik kirishi uchun ruxsat berilganidan keyin — aprel oyining boshida start olishi kutilmoqda. Mahalliy hukumat vakilining ta’kidlashicha, bu haftasiga 10 ming kishini vaksina bilan ta’minlovchi haqiqiy “vaksinadrom” bo‘ladi.