Россия Украинанинг шарқий чегарасига 40 минг аскарли қўшин тортди. Бу ҳақда Украина президенти Владимир Зеленскийнинг матбуот котиби Юлия Мендел маълум қилди, деб ёзади Meduza.
Киев маълумотларига кўра, яна 40 минг аскар Қримга жойлаштирилган. Шунингдек, Зеленский АҚШ президенти Жо Байдендан Россияни «жиловлашда» ёрдам сўради.
«АҚШ Украинанинг яхши дўсти, аммо АҚШ президенти Россияни жиловлаш ва Украина шарқидаги можарони тўхтатиш учун кўпроқ ҳаракат қилиши керак», — деди Владимир Зеленский CNN телеканалига берган интервьюсида.
«Киевга кўпроқ қурол-яроғ ва пул керак, айниқса, мамлакатнинг НАТЎга кириши учун кўпроқ ёрдам керак. Агар АҚШ Украинани НАТО таркибида кўрмоқчи бўлса, улар буни тўғридан-тўғри айтиши ва амалда кўрсатиши керак. Сўз билан эмас », — деди президент. Шунингдек, Зеленский билан суҳбатлашган мухбир Украинанинг НАТЎга қўшилиши борасида АҚШнинг ҳал қилувчи ҳаракатлари эҳтимоли камлиги, чунки бу Москвани қўзғатиши ва чегарадаги зиддиятларни кучайтириши мумкинлигини айтди. «Сиз ҳақ бўлишингиз мумкин», — деб жавоб берди Зеленский мухбирга.
«Аммо ҳозир нима бўляпти? Биз чегараларда нима қиляпмиз? Одамларимиз бу ерда нима қиляпти? Улар курашмоқда», — дея қўшимча қилди Украина президенти.
12 апрель куни эрталаб Зеленский Украина шарқидаги можарони авж олиши масаласини муҳокама қилиш учун Россия президенти Владимир Путин билан музокаралар ўтказиш ҳақида Москвага сўров юборди. Шунингдек, Украина Ташқи ишлар вазирлиги Москвадан чегарада қўшин йиғишдан мақсади нима эканини изоҳлашни талаб қилди. «Афсуски, Россия томон бундай изоҳлар юбормаслигини айтиб, сўровга биноан муҳим маълумотларни тақдим этишдан бош тортди», — деди вазирлик.Россия президентининг матбуот котиби Дмитрий Песков, Украина раҳбарининг Путин билан музокаралар ўтказиш тўғрисидаги илтимосларини кўрмаганини ва охирги кунларда бундай сўровлар келган-келмаганини билмаслигини айтди.
Песков, шунингдек, Россия қўшинлари ўз мамлакати ҳудуди бўйлаб ҳаракатланаётганини ва шунинг учун улар ўзлари маъқул кўрган йўналишлар бўйлаб ҳаракатланиши мумкинлигини бир неча бор таъкидлади. Президент вакили, шунингдек, қўшинларни қайта жойлаштириш бошқа давлатлар учун хавф туғдирмаслигини айтди.
Бирлашган Миллатлар Ташкилоти (БМТ) Донбассдаги барча томонларнинг зиддият келтириб чиқаришдан тийилишга ва можаронинг авж олишига олиб келиши мумкин бўлган ҳаракатларни тўхтатишга чақирмоқда.
«Можарода иштирок этаётган ва унга алоқадор бўлган барча томонлардан шуни сўраймизки, максимал даражада вазмин бўлинг, можаронинг авж олишига ҳисса қўшиши мумкин бўлган ҳар қандай ҳаракатлар ва риторикалардан сақланинг. Барча масалалар ўзаро мулоқот орқали ҳал қилиниши керак », — деди БМТ бош котибининг вакили Стефан Дюжаррик.
Шунингдек, у можаро зонасида инсонпарварлик муаммолари кўпайиб бораётганидан БМТнинг ташвишда эканини алоҳида таъкидлади. Дюжаррикнинг таъкидлашича, ташкилот Украина шарқида ўт очишни тўхтатиш режимининг бузилиши, қўшинларнинг ҳаракатлари кўпайгани ҳақидаги хабарларни хавотир билан кузатмоқда.
Ўз навбатида G7 мамлакатлари (Канада, Франция, Германия, Италия, Япония, Буюк Британия ва АҚШ) ташқи ишлар вазирлари, шунингдек, Европа Иттифоқи вакили Россия қўшинларининг Украина чегараларига ва Қримга жойлаштирлишидан хавотир билдириб, Россияни ушбу «провокацияларни тўхтатишга» чақирди.
«Ушбу катта ҳажмдаги огоҳлантирилмаган қўшин таҳдид солувчи ва беқарорлаштирувчи ҳаракатларни келтириб чиқармоқда. Биз Россияни халқаро мажбуриятларга мувофиқ провокацияларни тўхтатишга ва кескинликни дарҳол юмшатишга чақирамиз», — дейилади G7 баёнотида.
Вазирлар, шунингдек, Россияга Европа Хавфсизлик ва ҳамкорлик ташкилоти фаолияти принципларини эслатди ва уни ҳарбий кучлар ҳаракатининг шаффофлиги бўйича ўз мажбуриятларини бажаришга чақирди. Улар Украина шарқидаги можарони сиёсий йўл билан ҳал қилишнинг ягона йўли Минск келишувларининг амалга оширилиши эканини айтди.
Изоҳ (0)