АҚШнинг собиқ президенти Дональд Трамп республикачилар партияси ҳомийлари билан ўтган кечки овқат пайтида коронавирусга қарши вакцинани Trumpcine («Трампсина») деб аташни таклиф қилди, деб ёзади Business Insider.
Хабарга кўра, собиқ давлат раҳбари пандемияга қарши курашда ўзининг хизматларини қайд этиб ўтган ва коронавирусни даволаш учун бир нечта дориларнинг яратилишида ўз ҳиссаси борлигини таъкидлаган. Трампнинг айтишича, айнан у COVID-19’га қарши вакцинани ишлаб чиқаришни тезлаштириш операциясини бошлаб берган.
«Умид қиламанки, ҳар ким COVID-19 (кўпинча Хитой вируси номи билан аталувчи) вакцинасини қабул қилаётганида шуни эсга оладики, агар мен президент бўлмаганимда, эҳтимол, беш йил ичида ҳам сиз зарур вакцинани олмаган бўлар эдингиз», — деди Трамп. У аргумент сифатида COVID-19’га қарши воситаларни ишлаб чиқаришни тезлаштириш учун «Warp Speed» операциясини бошлаганига ишора қилди.
Бироқ, нашрнинг таъкидлашича, собиқ давлат раҳбарининг бирорта саъй-ҳаракатлари COVID-19’га қарши вакцина ишлаб чиқаришга кетадиган вақтни қисқартиришда ёрдам бергани тўғрисида далиллар йўқ.
«Трампнинг иддао қилишича, ҳамма коронавирусга қарши препаратни вакцина дейиш ўрнига Trumpcине деб аташи керак», — деб ёзган CNN мухбири Кевин Липтак Twitter’да.
Бундан ташқари, у ўз штатларидаги вакцинация ишларини қўллаб-қувватлаган республикачи губернаторларни алқади ва собиқ бош тиббий маслаҳатчи доктор Энтони Фаучни «мақтанчоқ» деб атади.
Аввалроқ Дональд Трамп ўз тарафдорлари билан мулоқот қилиш мақсадида ўзининг «45office.com» шахсий сайтини ишга туширган эди. «Дональд Трампнинг офиси Трамп маъмуриятининг буюк қадриятини сақлаб қолишга интилмоқда, шу билан бирга, America First (Америка биринчи навбатда) дастурини илгари сурмоқда», — дейилган сайт тавсифида.
Изоҳ (0)