Буюк Британия бош вазири Борис Жонсон Оксфордшир графлигида жойлашган коттежини ижарага бермоқчи. Бу ҳақда Strutt&Parker кўчмас мулк агентлиги ахборотига таяниб The Times хабар берди. Ижаранинг минимал муддати бир йилни ташкил қилади.
Эълонга кўра, хонадонда тўртта хона, унча катта бўлмаган ошхона ва қишки боғли айвон хонаси мавжуд. Ижарачилар теннис корти ва бассейндан фойдаланиши мумкин. Коттежнинг умумий майдони ёнма-ён қурилган бино билан биргаликда 288,5 квадрат метрни ташкил этади, уй мебелларсиз ижарага берилади. Уй ҳайвонларини хонадонда парвариш қилишга ҳам уй эгалари билан келишган ҳолда рухсат олинади. Эълон бўйича уйнинг ҳафталик ижараси — 981 фунт стерлинг (ойига 4,25 минг фунт).
Нашрнинг қайд этишича, Борис Жонсон ушбу коттежни 2003 йилда 690 минг фунт эвазига сотиб олган. Айни вақтда хонадоннинг нархи 1,2 миллион фунтга баҳоланмоқда. 2019 йил июль ойидан бери Жонсон ва унинг рафиқаси Кэрри Саймондс Даунинг-стритдаги янги таъмирланган 4 хонали резиденцияда яшайди. Маълумотларга кўра, бош вазир ва унинг оиласи Оксфордширдаги уйда хавфсизлик протоколларига қатъий риоя қилиш зарурлиги туфайли яшай олмайди, ҳукумат раҳбари ҳамда унинг оиласи шаҳар ташқарисидаги резиденция сифатида фақат Чекерсдан (Буюк Британия бош вазирининг шаҳар ташқарисидаги расмий қароргоҳи) фойдаланиши мумкин.
2019 йилда Жонсон ўзи ва рафиқасига тегишли XIX асрга оид Лондондаги таунхаусни сотиб юборганди. Буюк Британия бош вазири мазкур объект сотувидан 3,7 миллион АҚШ доллари миқдорида даромад олган.
Изоҳ (0)